បន្ទាយមានជ័យ: តាមសេចក្តីរាយការណ៍បានឲ្យដឹងថា មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើង បន្ទាប់ពីម៉ូតូម៉ាកវីវ៉ាមួយគ្រឿង ជិះឡើងជែងជាមួយនឹងម៉ូតូមួយគ្រឿងផ្សេងទៀតមិនផុត បណ្តាលឲ្យទាក់ដៃចង្កូតគ្នា ដួលខ្ទាតបុរសម្នាក់ចូលក្រោមកង់រថយន្តបែនរបស់ក្រុមហ៊ុន SCG កិនស្លាប់យ៉ាងអាណោចអាធ័ម ចំណែកម្នាក់ទៀតរងរបួសស្រាល។

ហេតុការណ៍នេះបានកើតឡើងកាលពីវេលាម៉ោង ១១ព្រឹក ថ្ងៃទី៤ ខែឧសភា ឆ្នាំ២០១៧ ស្ថិតនៅលើកំណាត់ផ្លូវជាតិលេខ៥ ក្នុងភូមិគោកទន្លាប់ ឃុំបន្ទាយរាង ស្រុកមង្គលបុរី ខេត្តបន្ទាយមានជ័យ។

ប្រភពព័ត៌មានបានឲ្យដឹងថា មុនពេលកើតហេតុគេបានឃើញ ម៉ូតូមួយគ្រឿងម៉ាក វីវ៉ា ធុន សេ១១០ ពណ៌ខ្មៅ ពាក់ស្លាកលេខ បាត់ដំបង 1B-7783 បើកបរដោយឈ្មោះ ពេជ្រ ខឿង ភេទប្រុស អាយុ៣២ឆ្នាំ ស្នាក់នៅភូមិមនោរម្យ ឃុំភ្នំតូច បានឌុបឈ្មោះ ប្រាក់ មើយ ភេទប្រុស អាយុ៤៣ឆ្នាំ ស្នាក់នៅភូមិជាមួយគ្នាធ្វើដំណលរតាមបណ្តោយផ្លូវជាតិលេខ៥ ក្នុងទិសដៅពីត្បូងទៅជើង លុះដល់ចំណុចកើតហេតុ ម៉ូតូជនរងគ្រោះបានឡើងជែងម៉ូតូមួយគ្រឿងទៀត មិនប្រយត្ន័បណ្តាលឲ្យទាក់ដៃចង្កូតគ្នា បណ្តាលឲ្យដួលទៅលើផ្លូវ ត្រូវបានរថយន្តម៉ាក ហ៊ីណូ ពណ៌ស ប្រភេទបែន ដឹកដី ពាក់ស្លាកលេខ បាត់ដំបង 3A-1524 ដែលកំពុងបើកបរក្នុងទិសដៅបញ្ច្រាស់ទិសគ្នា ជ្រុលមកកិនចំជនរងគ្រោះម្នាក់បណ្តាលឲ្យស្លាប់នៅនឹងកន្លែង យ៉ាងអាណោចអាធ័ម និងម្នាក់ទៀត រងរបួសស្រាល ។ ភ្លាមៗអ្នកបើកររថយន្តបានបើកទ្វា រត់គេចខ្លួនបាត់ស្រមោល បន្សល់ទុករថយន្តនៅនឹងកន្លែងកើតហេតុ។

ក្រោយពីហេតុការណ៍នេះបានកើតឡើង សមត្ថកិច្ចនគរបាលចរាចរណ៍បានចុះមកធ្វើការវាស់វែងដល់កន្លែងកើតហេតុ ដោយបាននាំយកមធ្យោបាយធ្វើដំណើរទាំង២គ្រឿង យកទៅរក្សាទុក រង់ចាំធ្វើការដោះស្រាយគ្នាពេលក្រោយតាមផ្លូវច្បាប់។ ចំណែកសាកសពជនរងគ្រោះ ត្រូវបានសមត្ថកិច្ចធ្វើកំណត់ហេតុ ប្រគល់ទៅឲ្យក្រុមគ្រួសារធ្វើបុណ្យតាមប្រពៃណី៕