ភ្នំពេញ: ក្បាលរថយន្តសណ្តោងទូរកុងតឺន័រមួយគ្រឿងអ្នកបើកបរអះអាងថា បែកកង់មុខខាងឆ្វេងក៏បានរេចង្កូតឡើងសួនច្បារខណ្ឌចែកទ្រូងផ្លូវបុកបង្គោលភ្លើងគោមបំភ្លឺផ្លូវ បណ្តាលឲ្យបាក់រាបដល់ដី ។
គ្រោះថ្នាក់នេះបង្កឲ្យភ្ញាក់ផ្អើលកាលពីម៉ោង៣និង១៥នាទីរសៀល ថ្ងៃទី២៦ ខែវិច្ឆិកា ឆ្នាំ ២០១៨ នៅតាមបណ្តាយផ្លូវភ្នំពេញហាណូយ ខាងត្បូងហ្គ្រេនភ្នំពេញ ក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ ។
ក្បាលរថយន្តសម្រាប់អូសកុងតឺន័រមួយគ្រឿងនោះម៉ាក FUSO ពណ៌ស ស្លាកលេខ ភ្នំពេញ 3E-3667 បើកបរដោយបុរសម្នាក់មិនស្គាល់អត្តសញ្ញាណ។
តាមសាក្សីបានឲ្យដឹងថា នៅមុនពេលកើតហេតុគេឃើញរថយន្តខាងលើបានធ្វើដំណើរតាមផ្លូវហាណូយ ក្នុងទិសដៅពីត្បូងទៅជើងក្នុងល្បឿនលឿន ។ ខណ:មកដល់ចំណុចខាងលើស្រាប់តែរថយន្តនោះក៏បានរេចង្កូតមកឆ្វេងដៃឡើងសួនច្បារបុកបង្គោលភ្លើងគោមបំភ្លឺផ្លូវនោះ បណ្តាលឲ្យបាក់រាបដល់ដីដាច់ត្រឹមគល់តែម្តង ។ បន្ទាប់ពីបុកបង្គោលភ្លើងបំភ្លឺផ្លូវអ្នកបើកបរបានព្យាយាមបើកគេចត្រឡប់ក្រោយបានប្រមាណ៥០០ម៉ែត្រប្រុងចូលកន្លែងប្តូរកង់ តែត្រូវបាននគរបាលបានទៅទាន់ ។
តាមអ្នកបើកបរបានប្រាប់នគរបាលឲ្យដឹងថា មូលហេតុដែលបុកបង្គោលភ្លើងបំភ្លឺផ្លូវដោយសារតែរថយន្តបែកកង់មុខខាងឆ្វេង ទើបរេចង្កូតឡើងសួនបុកបង្គោលភ្លើងគោមតែម្តង ។ រថយន្តនោះត្រូវបាននគរបាលចរាចរណ៍នាំយកទៅរក្សាទុកនៅការិយាល័យនគរបាលចរាចរណ៍ជើងគោកនៃស្នងការនគរបាលរាជធានីភ្នំពេញ ដើម្បីដោះស្រាយសងការខូចខាតទ្រព្យសម្បត្តិសាធារណ: ៕
មតិយោបល់