ភ្នំពេញៈ ជនសង្ស័យ៩នាក់ ត្រូវបានឃាត់ខ្លួនក្នុងប្រតិបត្តិការណ៍ចុះបង្ក្រាបគ្រឿងញៀន ៤ទីតាំងផ្សេងគ្នាក្នុងខណ្ឌឫស្សីកែវ។

ក្នុងប្រតិបត្តិការនេះដែល ដឹកនាំដោយអធិការរងខណ្ឌទទួលបន្ទុកផ្នែកព្រហ្មទណ្ឌលោក អ៊ីវ ឈុនផេង និងនាយផ្នែកប្រឆាំងបទល្មើសគ្រឿងញៀនខណ្ឌ លោកអនុសេនីយ៍ត្រី ម៉ៅ ចាន់ថុន បង្ក្រាបកាលពីថ្ងៃទី៤ ខែឧសភា ឆ្នាំ២០១៧នេះ ដោយដកហូតថ្នាំញៀនមួយចំនួន និងឧបករណ៍ប្រើប្រាស់មួយចំនួន។

លោក ម៉ៅ ចាន់ថុន នាយផ្នែកប្រឆាំងបទល្មើសគ្រឿងញៀនខណ្ឌ បានប្រាប់ឲ្យដឹងថា នៅក្នុងប្រតិបត្តិការចុះបង្ក្រាបនេះដែរ ដោយមានការបញ្ជាផ្ទាល់ពីលោកវរៈសេនីយ៍ឯក ទៀង ច័ន្ទសារ អធិការខណ្ឌឫស្សីកែវ បានដាក់បញ្ជាឲ្យសមត្ថកិច្ចធ្វើការបង្ក្រាបគ្រឿងញៀនដូចមេឃភ្លៀងរលឹម ធ្វើយ៉ាងណាលុបបំបាត់ឲ្យអស់នៅទីតាំងជួញដូរ និងចែកចាយ ក៏ដូចជាទីតាំងប្រើប្រាស់គ្រឿងញៀនផងដែរ។ ក្រោយពីបានទទួលបញ្ជារួចមក សមត្ថកិច្ចយើងបានធ្វើការស្រាវជ្រាវរហូតឈានដល់ការចុះបង្ក្រាបទីតាំងទី១ កាលពីវេលាម៉ោង ១និង៣០នាទីរសៀល នៅចំណុចក្នុងវត្តញាណរង្សី ក្រុម៩ ភូមិទួលគោក សង្កាត់ទួលសង្កែ ដោយធ្វើការឃាត់ខ្លួនជនសង្ស័យ ៥នាក់ ដកហូតថ្នាំញៀន ៣កញ្ចប់តូច និងឧបករណ៍ប្រើប្រាស់មួយចំនួន។ ទីតាំងទី២ កាលពីវេលាម៉ោង ៣និង៣០នាទីរសៀល គឺនៅតាមបណ្តោយផ្លូវជាតិលេខ៥ ក្រុម១៤ ភូមិផ្សារតូច សង្កាត់ទួលសង្កែ ដោយឃាត់ខ្លួនជនសង្ស័យម្នាក់ដកហូតថ្នាំញៀនចំនួន ២កញ្ចប់តូច។ ទីតាំងទី៣ កាលពីវេលាម៉ោង ៥និង១០នាទីល្ងាច នៅក្នុងចំណុចផ្ទះសំណាក់យីហោ អស់កង្វល់ បន្ទប់លេខ២០៩ និងបន្ទប់លេខ២០៦ ដែលនៅតាមបណ្តោយផ្លូវជាតិលេខ៥ ក្រុម៦ ភូមិឡកំបោរ សង្កាត់ស្វាយប៉ាក ដោយឃាត់ខ្លួនជនសង្ស័យចំនួន ២នាក់ ដកហូតថ្នាំញៀនចំនួន ៤កញ្ចប់តូច ថង់ប្លាស្ទិចមួយចំនួន និងឧបករណ៍ប្រើប្រាស់គ្រឿងញៀនមួយចំនួន និងទីតាំងទី៤ កាលពីវេលាម៉ោង ៧យប់ នៅខាងក្រោយរោងចក្រ ម៉ូរៀ នៅចំណុចលើបែបណ្តែតទឹក ផ្លូវលំ ភូមិលូ សង្កាត់ស្វាយប៉ាក ដោយឃាត់ជនសង្ស័យម្នាក់ ដកហូតថ្នាំញៀន ២កញ្ចប់ ក្នុងនោះមាន ១កញ្ចប់ធំ ថង់ប្លាស្ទិចសម្រាប់ច្រកមួយចំនួន ដាវកែច្នៃចំនួន មួយដើម ជញ្ជីងថ្លឹងថ្នាំញៀនចំនួន ២គ្រឿង និងឧបករណ៍ប្រើប្រាស់គ្រឿងញៀនមួយចំនួន។

លោក ម៉ៅ ចាន់ថុន បានបន្តទៀតថា ជនសង្ស័យទាំង ៩នាក់ខាងលើនេះ ទី១ឈ្មោះ ម៉ូ វណ្ឌី ភេទប្រុស អាយុ ១៨ឆ្នាំ មុខរបរ មិនពិតប្រាកដ (ជួញដូរ) ស្នាក់នៅផ្ទះគ្មានលេខ ផ្លូវលំ ភូមិទួលគោក សង្កាត់ទួលសង្កែ,ទី២ឈ្មោះ ថៃ បូរី ភេទប្រុស អាយុ ២៧ឆ្នាំ មុខរបរ មិនពិតប្រាកដ (ជួញដូរ) ស្នាក់នៅផ្ទះជួល សង្កាត់ឃ្មួញ ខណ្ឌសែនសុខ,ទី៣ឈ្មោះ ម៉ិល ធីឌឿន ភេទប្រុស អាយុ ៣៧ឆ្នាំ មុខរបរ កម្មករ (ប្រើប្រាស់),ទី៤ឈ្មោះ ម៉ិល ធីដា ភេទប្រុស អាយុ ៣៨ឆ្នាំ មុខរបរ កម្មករ (ប្រើប្រាស់) បច្ចុប្បន្នអ្នកទាំង ២នាក់ស្នាក់នៅផ្ទះគ្មានលេខ ផ្លូវលំ ភូមិទួលគោក សង្កាត់ទួលសង្កែ,ទី៥ឈ្មោះ ពេញ ចាន់រស្មី ភេទប្រុស អាយុ ២៥ឆ្នាំ មុខរបរ មិនពិតប្រាកដ (ប្រើប្រាស់) ស្នាក់នៅក្នុងវត្តញាណរង្សី ភូមិទួលគោក សង្កាត់ទួលសង្កែ, ទី៦ឈ្មោះ វ៉ា វណ្ណា ភេទប្រុស អាយុ ៣៤ឆ្នាំ មុខរបរ មិនពិតប្រាកដ (រក្សាទុក) ស្នាក់នៅផ្ទះគ្មានលេខ ផ្លូវលំ ភូមិសាមគ្គី សង្កាត់ឫស្សីកែវ,ទី៧ឈ្មោះ វឿន សារី ភេទប្រុស អាយុ ៣២ឆ្នាំ មុខរបរ កម្មករ (ជួញដូរ) ,ទី៨ឈ្មោះ វឿន សូរា ភេទប្រុស អាយុ ២៨ឆ្នាំ មុខរបរ កម្មករ (ជួញដូរ) បច្ចុប្បន្នអ្នកទាំង ២នាក់ស្នាក់នៅក្នុងដីឡូត៍ ក្រុម៨ ភូមិស្វាយប៉ាក សង្កាត់ស្វាយប៉ាក និងទី៩ឈ្មោះ ស៊ីម សូរីយ៉ា ភេទប្រុស អាយុ ៣២ឆ្នាំ មុខរបរ មិនពិតប្រាកដ (ជួញដូរ) ស្នាក់នៅលើបែបណ្តែតទឹក ផ្លូវលំ ភូមិលូ សង្កាត់ស្វាយប៉ាក ខណ្ឌឫស្សីកែវ។ ចំណែកឯវត្ថុតាងដែលសមត្ថកិច្ចដកហូតរួមមាន ម្សៅក្រាមពណ៌សថ្លា ចំនួន ១១កញ្ចប់ ដោយក្នុងនោះមាន ១កញ្ចប់ធំ ជាប្រភេទម៉ាទឹកកក ថង់ប្លាស្ទិចសម្រាប់ច្រកមួយចំនួន ដាវកែច្នៃចំនួន ១ដើម ជញ្ជីងថ្លឹងថ្នាំញៀនចំនួន ២គ្រឿង និងឧបករណ៍ប្រើប្រាស់គ្រឿងញៀនមួយចំនួន។

បច្ចុប្បន្នជនសង្ស័យទាំង ៩នាក់ខាងលើ រួមនឹងវត្ថុតាងត្រូវសមត្ថកិច្ចបញ្ជូនខ្លួនទៅឃុំជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការបន្តតាមនីតិវិធីច្បាប់៕