បន្ទាយមានជ័យ:ទិវាពិភពលោកកាកបាទក្រហម អឌ្ឍចន្ទក្រហមខួបលើទី១៥៣ ក្រោមប្រធានបទ «កាកបាទក្រហមមានគ្រប់ទីកន្លែង សម្រាប់គ្រប់ៗគ្នា » ត្រូវបានសាខាកាកបាទក្រហមខេត្តបន្ទាយមានជ័យ ប្រារព្ធ ធ្វើឡើងនៅថ្ងៃទី ១៨ ឧសភា ២០១៦ ក្រោមអធិបតីភាពលោកស្រ្តី ម៉ៅ ម៉ាឡៃ កែគឹម យ៉ាន តំណាងខ្ពង់ខ្ពស់ លោក ឧបនាយករដ្ឋមន្រ្តី កែ គឹមយ៉ាន អាជ្ញាធរ មន្រ្តីនៃស្ថាប័ន ពាក់ព័ន្ធ និងសប្បរសជន រាប់រយនាក់។

លោក លី សារី អភិបាលរងខេត្ត និងជាប្រធានសាខាកាកបាទ ក្រហមខេត្តបន្ទាយមានជ័យ មានប្រសាសន៍ថា ទិវាពិភពលោក កាកបាទក្រហម អឌ្ឍចន្ទក្រហមខួបលើទី១៥៣ នៅថ្ងៃទី ៨ឧសភា ២០១៦ ដែលបានប្រារព្ធ ក្រោមប្រធានបទ”កាកបាទក្រហមមាន គ្រប់ទីកន្លែង សម្រាប់គ្រប់ៗគ្នា” គឺជាទិវាមួយនៃការជួបជុំមហាគ្រួសារមនុស្សធម៌ ដ៏ធំប្រចាំឆ្នាំ នៅទូទាំងពិភព លោក ដើម្បីរំលឹកគុណ និងអបអរសាទរគាំទ្រយ៉ាងក្លៀវក្លានូវគោលគំនិតផ្តួចផ្តើមបង្កើតឲ្យមានចលនាកាកបាទក្រហម អឌ្ឍចន្ទក្រហម ឡើងតាំងពី ១៥៣ ឆ្នាំកន្លងទៅ។

លោក បានបន្តទៀតថា សមិទ្ធផលសម្រេចបានក្នុងរយះពេល១២ខែ របស់សាខាកាកបាទ ក្រហមខេត្តបន្ទាយមានជ័យ ដែលបានកំពុងប្រតិបត្តិការស្របតាមយុទ្ធសាស្រ្ត២០១១-២០២០ របស់កាកបាទក្រហមកម្ពុជា ក្រោមការដឹកនាំដ៏ខ្ពង់ខ្ពស់របស់សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដោយសម្តេចតែងគិតគូពីសុខទុក្ខបងប្អូនប្រជាពលរដ្ឋ និងធ្វើការងារមនុស្សធម៌ដោយមិនប្រកាន់ពណ៌សម្បុរ ជាតិសាសន៍ និន្នាការនយោបាយអ្វីឡើយ ។ ក្នុងនោះការឆ្លើយតប់សង្គ្រោះបន្ទាន់ក្នុងរយះពេល១២ខែលរបស់សាខាកាកបាទក្រហមខេត្តបានចែកអំណោយមនុស្សធម៍សរុប៣០៥៩គ្រួសារ។

លោក សួន បវរ អភិបាលខេត្តបន្ទាយមានជ័យ បានអានសេចក្តីថ្លែងការណ៍សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា រួចមក សប្បុរសជន បានចូលរួមជាថវិការ ផ្តល់ដល់កាកបាទក្រហមខេត្ត សម្រាប់ជួយក្នុងកិច្ចការមនុស្សធម៌សរុបបានចំនួន ១០១ ៨១៨ ដុល្លាអាមេរិក៕