បាត់ដំបងៈ លោកអធិការរងស្រុកមោងឬស្សី បានប្រាប់ Post Newsថា មានករណីគ្រោះថ្នាក់ចរាចរណ៍មួយ បង្កឡើងដោយម៉ូតូមួយគ្រឿង ជិះឌុបគ្នា៤នាក់ បានជិះទៅបុកជាមួយនឹងរថយន្តដែលកំពុងបើកបរបញ្ច្រាសទិសគ្នាពេញទំហឹង បណ្តាលឲ្យមនុស្ស៣នាក់ស្លាប់ និងម្នាក់ទៀតរបួសធ្ងន់ ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោង១និង ៤៥នាទី ថ្ងៃទី១១ ខែឧសភា ឆ្នាំ២០១៧ ស្ថិតនៅចំណុចក្រុម៥ ភូមិស្ទឹងចក ឃុំព្រៃតូច ស្រុកមោងឬស្សី ខេត្តបាត់ដំបង។

សមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ កើតឡើងរវាង ម៉ូតូមួយគ្រឿង ម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១១ ពាក់ស្លាកលេខ បាត់ដំបង1K-0753 ជិះគ្នា៤នាក់ អ្នកបើកបរមិនស្គាល់ឈ្មោះ (ស្លាប់) ធ្វើដំណើរពីទិសភ្នំពេញ ទៅបាត់ដំបង លុះមកដល់ចំណុចកើតហេតុ បានឡើងជែងរថយន្ត រួចក៏បុកជាមួយរថយន្តមួយគ្រឿងម៉ាក ឡិចស៊ីស RX300 ពណ៌ខ្មៅ ពាក់ស្លាកលេខ ភ្នំពេញ 2J-9990 អ្នកបើកបរគេចខ្លួន ធ្វើដំណើរក្នុងទិសដៅបញ្ច្រាសទិគ្នា បណ្តាលឲ្យអ្នកជិះម៉ូតូ ស្លាប់មនុស្ស៣នាក់ ក្នុងនោះមានស្រី២នាក់ និងរបួសធ្ងន់ម្នាក់ជាមនុស្សស្រី។

ក្រោយកើតហេតុ សមត្ថកិច្ចនគរបាលចរាចរណ៍បានចុះមកធ្វើការវាស់វែង នាំយកធម្យោបាយធ្វើដំណើរទាំង២គ្រឿង យកទៅរក្សាទុកនៅ ការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តបាត់ដំបង ដើម្បីដោះស្រាយគ្នាពេលក្រោយតាមផ្លូវច្បាប់បន្ត៕