ភ្នំពេញៈ កម្មករសំណង់នៅក្នុងក្រុមហ៊ុនសំណង់ចិនម្នាក់ ត្រូវបានដែកដែលមានទម្ងន់រាប់តោន រមៀលធ្លាក់ចំជនរងគ្រោះដែលកំពុងធ្វើការទាក់ដែក ដើម្បីស្ទូចដាក់ឡាន រមៀលមកសង្កត់ពីលើបាក់ក បែកក្បាលស្លាប់គៀបជាប់នឹងជញ្ជាំងក្នុងក្រុមហ៊ុនសំណង់ខាងលើ ស្លាប់មួយរំពេច។

ហេតុការណ៍នេះបានកើតឡើងកាលពីវេលាម៉ោង៦ល្ងាច ថ្ងៃទី១២ ខែឧសភា ឆ្នាំ២០១៧ ស្ថិតនៅចំណុចក្រុមហ៊ុនសំណង់ចិនមួយកន្លែង ខាងក្រោយស្ថានទូតរុស្ស៊ី ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

ប្រភពព័ត៌មាន បានឲ្យដឹងផងដែរថា សាកសពជនរងគ្រោះដែលស្លាប់ខាងលើ ត្រូវបានគេស្គាល់មានឈ្មោះ ចក់ ចយ ភេទប្រុស អាយុ២៨ឆ្នាំ មុខរបរជាកម្មករសំណង់ មានស្រុកកំណើតនៅភូមិខ្លុង ឃុំទួលព្រេច ស្រុកអង្គស្នួល ខេត្តកណ្តាល។

មុនពេលកើតហេតុ គេបានឃើញជនរងគ្រោះបានឈរទាក់ដែក ដើម្បីរថយន្តស្ទូចធ្វើការស្ទូចយកទៅពុត មុននឹងបញ្ចេញទៅការដ្ឋានផ្សេងៗ ខណៈដែលកំពុងតែទាក់ដែកនោះ ស្រាប់ដុំដែកដែលមានទម្ងន់រាប់តោនខាងលើបានរមៀលចំជនរងគ្រោះកំពុងឈរ បណ្តាលឲ្យធ្លាក់ចូលប្រឡោះក្បែររបងក្រុមហ៊ុនសំណង់ ហើយត្រូវដុំដែកខាងលើ ធ្លាក់មកសង្កត់បន្ថែមលើជនរងគ្រោះ បណ្តាលឲ្យបាក់ឆ្អឹងខ្លួន បាក់ក បែកក្បាលខ្ទេចមុខ ស្លាប់យ៉ាងរន្ធត់បែបនេះ។

ក្រោយកើតហេតុ សមត្ថកិច្ចនគរបាលព្រហ្មទណ្ឌខណ្ឌចំការមន បានចុះមកធ្វើការត្រួតពិនិត្យដល់កន្លែងកើតហេតុ ដោយបានប្រគល់សាកសពជនរងគ្រោះទៅឲ្យក្រុមគ្រួសារធ្វើបុណ្យតាមប្រពៃណីនៅឯស្រុកកំណើត៕