ក្រចេះ: លោក វរសេនីយ៍ទោ នេត លីន អធិការក្រុងក្រចេះ បានប្រាប់ Post Newsថា
មានករណីអគ្គិភ័យមួយបានកើតឡើង បន្ទាប់ពីជនសង្ស័យម្នាក់ មានជម្លោះក្នុងគ្រួសារ បានធ្វើសកម្មភាពដុតផ្ទះខ្លួនឯង បណ្តាលឲ្យឆាបឆេះអស់ទាំងស្រុង។

ហេតុការណ៍នេះបានកើតឡើងកាលពីវេលាម៉ោង៣និង២០នាទី រសៀលថ្ងៃទី១៣ ខែឧសភា ឆ្នាំ២០១៧ ស្ថិតនៅចំណុចភូមិស្រែស្តៅ សង្កាត់អូរឬស្សី ក្រុងក្រចេះ ខេត្តក្រចេះ។

ជនសង្ស័យជាម្ចាស់ផ្ទះ ដែលសមត្ថកិច្ចឃាត់ខ្លួនខាងលើនេះមានឈ្មោះ សំ ពិសិដ្ឋ ភេទប្រុស អាយុ៣១ឆ្នាំ ស្នាក់នៅផ្ទះកើតហេតុខាងលើ។

ក្នុងនោះដែរ អគ្គិភ័យបានលេបត្របាក់ ផ្ទះផ្ទាល់ដី ទំហំ ៥ម៉ែត្រ គុណ១២ម៉ែត្រ ធ្វើអំពីឈើប្រក់ស័ង្កសី សរុបជាទឹកប្រាក់ ប្រហែល៦ពាន់ដុល្លារ ដោយប្រើប្រាស់ទឹកក្នុងការបាញ់ពន្លត់អស់ចំនួន២គ្រឿង ទើបរលត់ទៅវិញ សំណាងល្អមិនបណ្តាលឲ្យនរណាម្នាក់ មានរបួសនោះទេ។

ក្នុងនោះដែរ សមត្ថកិច្ចបានបញ្ជាក់ថា មូលហេតុ គឺមានជម្លោះផ្ទៃក្នុងគ្រួសារ ទើបឈានទៅដល់ការដុតផ្ទះខ្លួនឯងបែបនេះ ហើយបច្ចុប្បន្ន ជនសង្ស័យខាងលើ ត្រូវបានសមត្ថកិច្ចឃាត់ខ្លួនជាបណ្តោះអាសន្ន នៅអធិការដ្ឋាននគរបាលក្រុងក្រចេះ ដើម្បីចាត់ការបន្តតាមផ្លូវច្បាប់៕