ភ្នំពេញ: ជនសង្ស័យម្នាក់ ក្នុងចំណោមបក្ខពួក៤នាក់ ត្រូវប្រជាពលរដ្ឋព្រួតវាយម្នាក់ មួយដៃមួយជើងទ្រោមខ្លួន ទើបប្រគល់ឲ្យសមត្ថកិច្ច បន្ទាប់ពីធ្វើសកម្មភាពឆក់កាបូបពីបុរសម្នាក់ តែមិនបានសម្រេច។

ហេតុការណ៍នេះបានកើតឡើងកាលពីវេលាម៉ោង៩និង ៣០នាទី យប់ថ្ងៃទី១៤ ខែឧសភា ឆ្នាំ២០១៧ ស្ថិតនៅចំណុចផ្លូវលេខ៧០ កែងផ្លូវR៦ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យមានឈ្មោះ ម៉េង ឡុង ភេទប្រុស អាយុ២២ឆ្នាំ មុខរបរជាជាងកញ្ចក់ ស្នាក់នៅម្ដុំវត្តសំរោងអណ្ដែត សង្កាត់ភ្នំពេញថ្មី ខណ្ឌសែនសុខ (ជាអ្នកឆក់) ជិះម៉ូតូម៉ាកហុងដាឌ្រីមសង់សេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ1CU-3788 (ដកហូត )។ ចំណែកបក្ខពួក៣នាក់ទៀតគេចខ្លួនបាត់។រឯជនរងគ្រោះរងរបួស ត្រូវបានសាច់ញាតិដឹកយកទៅព្យាបាលរបួសនៅមន្ទីរពេទ្យ។

តាមការសារភាពរបស់ជនសង្ស័យបានឲ្យដឹងថា ពួកគេមានគ្នា៤នាក់ ជិះម៉ូតូម៉ាកហុដាឌ្រីមចំនួន២គ្រឿង ស៊េរីឆ្នាំ២០១៥ មួយគ្រឿង និងឆ្នាំ២០០៩មួយគ្រឿង ជិះចេញពីម្ដុំវត្តសំរោង អណ្ដែត ដោយមានឱកាសល្អ រូបគេក៏ធ្វើសកម្មភាពឆក់ តែសំណាងអាក្រក់ឆក់មិនបានសម្រេច ហើយត្រូវប្រជាពលរដ្ឋបើកឡានដេញកៀរឲ្យដួលចាប់បានតែម្ដង។ ចំណែកបក្ខពួក៣នាក់ទៀតនាំគ្នាជិះម៉ូតូមួយគ្រឿងទៀតជិះគេចខ្លួនបាត់។

ក្រោយពីកើតហេតុ កម្លាំងសមត្ថកិច្ចមូលដ្ឋានបានចុះដល់កន្លែងកើតហេតុ យកម៉ូតូជនសង្ស័យ ដែលសកម្មភាពនិងនាំខ្លួនជនសង្ស័យយកមកសួរនាំនិងកសាងសុំណុំរឿងចាត់ការតាមនីតិវិធីច្បាប់៕