ព័ត៌មានជាតិ

ឃាត់ខ្លួនជនជាតិខ្មែរឥស្លាមម្នាក់ នៅផ្ទះសំណាក់រិទ្ធិ គិរីរ័ត្ន ពាក់ពន្ធ័ករណីជួញដូរគ្រឿងញៀន

តាកែវ: តាមសេចក្តីរាយការណ៍ បានឲ្យដឹងថា ជនសង្ស័យម្នាក់ ត្រូវបានសមត្ថកិច្ចធ្វើការចាប់ខ្លួននៅក្នុងផ្ទះសំណាក់យីហោ រិទ្ធិ គិរីរ័ត្ន ដកហូតបានថ្នាំញៀនចំនួន៦កញ្ចប់ រួមនឹងវត្ថុតាង មួយចំនួន។

ការឃាត់ខ្លួននេះបានធ្វើឡើងកាលពីវេលាម៉ោង១១និង៥នាទី ថ្ងៃទី១៥ ខែឧសភា ឆ្នាំ២០១៧ នៅចំណុចផ្ទះសំណាក់រិទ្ធិគិរីរ័ត្ន ស្ថិតនៅភូមិកំពង់ ឃុំព្រះបាទជាន់ជុំ ស្រុកគិរីវង់ ខេត្តតាកែវ។

មុននឹងឈានដល់ការចាប់ខ្លួនបានជនសង្ស័យខាងលើ កម្លាំងអធិការដ្ឋាននគរបាលស្រុកគិរីវង់ បានសហការជាមួយកម្លាំងប៉ុស្តិ៍នគរបាលរដ្ឋបាលព្រះបាទជាន់ជុំ បានធ្វើការឃាត់ខ្លួនជនសង្ស័យជាមុខសញ្ញាជួញដូរសារធាតុញៀនខុសច្បាប់ ម្នាក់ឈ្មោះ សុះ រ៉ន ភេទប្រុស អាយុ៣៥ឆ្នាំ សញ្ជាតិខ្មែរឥស្លាម ស្នាក់នៅភូមិពោធិ៍ខ្វិត ឃុំព្រះបាទជាន់ជុំ ស្រុកគិរីវង់ ខេត្តតាកែវ។

ក្នុងពេលឃាត់ខ្លួននេះដែរ សមត្ថកិច្ចបានឆែកឆេររកឃើញ និងដកហូតវត្ថុតាងបានរួមមាន៖ ថ្នាំញៀនម្ស៉ៅក្រាម ថ្លាពណ៌ស ចំនួន៦កញ្ចប់តូច,ដាវស៊ាំម៉ូរ៉ៃ១ដើម, អូប៉ាឡ័រចម្រៀងចំនួន២,ទូរសព្ទដៃខូចចំនួន៥គ្រឿង រួមទាំងឧបករណ៍សម្រាប់ជក់មួយចំនួន។

គួរបញ្ជាក់ផងដែរថា ជនសង្ស័យរូបនេះ ធ្លាប់ជាប់ពន្ធនាគារម្តងរួចមកហើយ ពាក់ព័ន្ធប្រព្រឹត្តអំពើលួចកាលពីឆ្នាំ២០១៤ ហើយបច្ចុប្បន្នកម្លាំងជំនាញ កំពុងកសាងសំណុំរឿងបញ្ជូនខ្លួនទៅកាន់ស្នងការដ្ឋានចាត់ការតាមច្បាប់៕

មតិយោបល់