ព្រះសីហនុ: ជនសង្ស័យម្នាក់ ត្រូវបានកម្លាំងសមត្ថកិច្ចធ្វើការចាប់ខ្លួន ក្រោយពីធ្វើសកម្មភាពលួច IPed និងទូរសព្ទ Iphone របស់គេបានសម្រេចហើយព្យាយាមគេចខ្លួន។

ការឃាត់ខ្លួននេះ បានធ្វើឡើងកាលពីវេលាម៉ោង៩ព្រឹក ថ្ងៃទី១៥ ខែឧសភា ឆ្នាំ២០១៧ ។

មុននឹងឈានដល់ការចាប់ខ្លួនបានជនសង្ស័យខាងលើ ការិយាល័យនគរបាលព្រហ្មទណ្ឌកម្រិតស្រាលបានទទួលបណ្តឹងពីឈ្មោះ ផុន ភីរុណ ភេទប្រុស អាយុ៣០ឆ្នាំ មុខរបរគ្រូបង្រៀន មានទីលំនៅ ភូមិ១ សង្កាត់៣ ក្រុង-ខេត្តព្រះសីហនុ ពីបទចោរកម្ម (លួចសម្ភារ:ក្នុងបន្ទប់) បន្ទាប់មកកម្លាំងការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងប៉ុស្តិ៍នគរបាលរដ្ឋបាលសង្កាត់លេខ២ បានធ្វើការស្រាវជ្រាវស៊ើបអង្កេតយ៉ាងយកចិត្តទុកដាក់ រហូតឈានដល់ការឃាត់ខ្លួនបានជនសង្ស័យ នៅវេលាម៉ោង ១០ ព្រឹកថ្ងៃកើតហេតុនេះតែម្តង។

ជនសង្ស័យ ដែលឃាត់ខ្លួនបានមានឈ្មោះ សុខ ជា ភេទប្រុស អាយុ២១ឆ្នាំ មុខរបរ និងទីកន្លែងស្នាក់នៅមិនពិតប្រាកដ។

ក្នុងនោះដែរ សមត្ថកិច្ចធ្វើការដកហូតបាន ទូរសព្ទIphone 5s ពណ៌ប្រផេះ លាយខ្មៅចំនួន១គ្រឿង, Iped ម៉ាកApple ពណ៌ប្រផេះលាយខ្មៅ ១គ្រឿង,លុយដុល្លារក្លែងក្លាយ ៣០០ដុល្លារ,លុយខ្មែរ ១,៥០០ រៀល និងស៊ីមកាត ស្មាត ចំនួន១ ។

បច្ចុប្បន្នជនសង្ស័យខាងលើនេះ ត្រូវបានការិយាល័យនគរបាលព្រហ្មទណ្ឌកម្រិតស្រាលកំពុងកសាងសំណុំរឿងដើម្បីបញ្ជូនទៅសាលាដំបូងខេត្តព្រះសីហនុចាត់ការតាមផ្លូវច្បាប់៕