ភ្នំពេញ: យោងតាមប្រភពពីសមត្ថកិច្ចខណ្ឌពោធិ៍សែនជ័យ បានឲ្យដឹងថា នៅរសៀលថ្ងៃទី១៥ ខែឧសភា ឆ្នាំ២០១៧នេះ លោក ស៊ិន វិរ: តំណាងអយ្យការអមសាលាដំបូងរាជធានីភ្នំពេញ បានឲ្យដឹងថា ក្រោយពីពិនិត្យលើឯកសារ និងសាកសួរជនជាប់ចោទ រួចរាល់ហើយ បានសម្រេចចោទប្រកាន់ជនត្រូវចោទឈ្មោះ ជា យ៉េត ភេទប្រុស អាយុ ៣១ឆ្នាំមុខ របររត់តាក់ស៊ី ស្រុកកំណើតភូមិ វិហារខ្ពស់ ឃុំសួង ស្រុកត្បូងឃ្មុំ ខេត្តកំពង់ចាម បច្ចុប្បន្ន ខេត្តត្បូងឃ្មុំ ពីបទ ជួញដូរដោយខុសច្បាប់ នូវសារធាតុញៀន យោងតាមមាត្រា ៤០នៃច្បាប់ស្តីពី ការត្រួតពិនិត្យគ្រឿងញៀន។

គួររំលឹកថា ជនត្រូវចោទឈ្មោះ ជា យ៉េត ត្រូវកម្លាំងអធិការនគរបាលខណ្ឌពោធិ៍សែនជ័យ ដែលដឹកនាំដោយលោកវរ:សេនីយឯក យឹម សារ៉ាន់ អធិការខណ្ឌ ឃាត់ខ្លួនកាលពីរសៀលថ្ងៃទី១២ ខែឧសភា ឆ្នាំ២០១៧ នៅចំណុចផ្ទះគ្មានលេខ ភូមិថ្មគោល៣ សង្កាត់ចោមចៅ ខណ្ឌពោធិ៍សែនជ័យ។

នៅក្នុងប្រតិបត្តិការនោះសមត្ថកិច្ចដកហូតបានគ្រឿងញៀនប្រភេទម្សៅក្រាម ពណ៌សថ្លា សង្ស័យថា មេតំហ្វេតាមីន (ម៉ាទឹកក) ទម្ងន់ជិត១គីឡូ ក្រាម ច្រកថង់ចំនួន ៨ថង់ធំ និង១ថង់តូច ជញ្ចីងថ្លឹងគ្រឿងញៀន ចំនួន១ ទូរសព្ទដៃចំនួន ៥គ្រឿង ថង់សម្រាប់វេចខ្ចប់មួយចំនួនធំ រថយន្តរបស់ជនសង្ស័យម៉ាក ឡិចស៊ីសRX300 ពណ៌ស្ក ១គ្រឿងពាក់ស្លាកលេខភ្នំពេញ 2N-5398 ក្រដាសវិក្កយបត្រវីងវេលុយជាង ១០សន្លឹកដោយមួយសន្លឹកៗ ចំនួនជាង១ពាន់ដុល្លារ និងសៀវភៅបញ្ជីកត់ចំនួនលក់ដូរគ្រឿងញៀន ចំនួន ១ក្បាល៕