កណ្តាល: មានករណីគ្រោះថ្នាក់ចរាចរមួយបានឡើងកាលពីវេលាម៉ោង១និង៣០នាទី រសៀលថ្ងៃទី១៥ ខែឧសភា ឆ្នាំ២០១៧ នៅតាមបណ្តោយផ្លូវជាតិលេខ៣ ចន្លោះគីឡូម៉ែត្រលេខ៣៣-៣៤ ក្នុងភូមិក្រាំងឈើនាង ឃុំត្បែង ស្រុកកណ្តាលស្ទឹង ខេត្តកណ្តាល ។

បង្កឡើងដោយរថយន្ត១គ្រឿងម៉ាកTowner ពណ៌ទឹកប៊ិច ពាក់ស្លាកលេខ ភ្នំពេញ 2P-7610 បើកបរដោយឈ្មោះ ស៊ឹម បញ្ញា ភេទប្រុស អាយុ២១ឆ្នាំ មុខរបរលក់កាហ្វេ(ក្រុមហ៊ុន) រស់នៅផ្ទះលេខ២៣៩ ផ្លូវលំ សង្កាត់ដង្កោ ខណ្ឌដង្កោ លុះពេលបើកបរមកដល់ចំណុចកើតហេតុខាងលើ បានបុកម៉ូតូ១គ្រឿងម៉ាក ហុងដា សេ១២៥ ស៊េរី០១៦ ពណ៌ខ្មៅ ពាក់ស្លាកលេខ ភ្នំពេញ1GB- 4883 បើកបរដោយឈ្មោះ កែន វាសនា ភេទប្រុស អាយុ២៧ឆ្នាំ មុខរបរកម្មកររោងចក្រ រស់នៅភូមិត្រពាំងរនាស់ ឃុំវាល ស្រុកគងពិសី ខេត្តកំពង់ស្ពឺ និងអ្នករួមដំណើរឈ្មោះ ស៊ឹម ពិទូ ភេទប្រុស អាយុ១៨ឆ្នាំមុខរបរ កម្មកររោងចក្រ រស់នៅភូមិឃុំជាមួយគ្នា បណ្តាលឲ្យរងរបួសធ្ងន់ទាំង២នាក់។

ក្រោយពីកើតហេតុជនរងគ្រោះបានបញ្ជូនទៅមន្ទីរពេទ្យនៅភ្នំពេញ ចំណែករថយន្ត និងម៉ូតូយកទៅរក្សាទុកនៅអធិការដ្ឋាននគរបាលស្រុកកណ្តាលស្ទឹង៕