ព័ត៌មានជាតិ

ម៉ូតូ២គ្រឿងបុកគ្នាពេញទំហឹង ស្លាប់ម្នាក់និងម្នាក់ទៀតបាក់ជើង

ឧត្តរមានជ័យ: លោកអធិការស្រុកអន្លង់វែង បានប្រាប់ Post News ថា មានករណីគ្រោះថ្នាក់ចរាចរមួយបានកើតឡើងរវាងម៉ូតូនឹងម៉ូតូ បណ្តាលស្លាប់ម្នាក់នៅនឹងកន្លែងនិងម្នាក់ទៀតរបួសបាក់ជើង។

ហេតុការណ៍នេះបានកើតឡើងកាលពីវេលាម៉ោង៨និង៣០នាទី យប់ថ្ងៃទី១៥ ខែឧសភា ឆ្នាំ២០១៧ នៅលើកំណាត់ផ្លូវជាតិលេខ៦៧ ចន្លោះបង្គោលគីទ្បូម៉ែត្រលេខ១២៦ -១២៧ ស្ថិតនៅភូមិទួលត្បែង ឃុំត្រពាំងប្រីយ៍ ខេត្តឧត្តរមានជ័យ។

លោកអធិការស្រុកបន្តថា អ្នកបើកម៉ូតូឈ្មោះ តុល ភេទប្រុស អាយុ៣០ ឆ្នាំ រស់នៅភូមិអភិវឌ្ឍ ឃុំអន្លង់វែង ស្រុកអន្លង់វែង រងរបួសធ្ងន់បាក់ដៃឆ្វេង ម៉ាកសេ១២៥ ពណ៌ខ្មៅ ពាក់ស្លាកលេខ ឧ-ជ1A-0448 ។
ជនរងគ្រោះឈ្មោះ ឈិន ឆៃចន្រ្ទា ភេទប្រុស អាយុ២៦ឆ្នាំ រស់នៅភូមិអូរអង្រែ ឃុំត្រពាំងតាវ ស្រុកអន្លង់វែង បណ្តាលឲ្យស្លាប់នៅកន្លែងកើតហេតុ បើកម៉ូតូម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខភ្នំពេញ 1AE-2865។

ក្រោយពីកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើការវាស់វែង និងនាំយកម៉ូតូទាំង២គ្រឿងមករក្សាទុក រង់ចាំការដោះស្រាយគ្នាពេលក្រោយ។ ចំណែកសាកសព ត្រូវបានសមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕

មតិយោបល់