កណ្ដាលៈ កម្លាំងអាវុធហត្ថខេត្តនិងស្រុកអង្គស្នួល បានចុះបង្ក្រាបករណី រក្សាទុកនិងជួញដូរ ដោយខុសច្បាប់នូវសារធាតុញៀនឃាត់ខ្លួនជនសង្ស័យ២នាក់រួមជាមួយវត្ថុតាង។

ប្រតិបត្តិការនេះបានធ្វើឡើងនៅថ្ងៃទី១៥ ខែកក្កដា ឆ្នាំ២០១៧ នៅចំណុចលើផ្លូវជាតិលេខ៥១ ភូមិព្រៃសំរោង ឃុំតំណាក់អំពិល ស្រុកអង្គស្នួល ខេត្តកណ្តាល។

ប្រភពព័ត៌មានបានឲ្យដឹងថា ជនសង្ស័យទី១ឈ្មោះ ទ្រី ស៊ីដុល្លា ភេទប្រុស អាយុ ២៤ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅផ្ទះជួល ភូមិព្រៃគុយ ឃុំត្រពាំងគង ស្រុកសំរោងទង ខេត្តកំពង់ស្ពឺ និងទី២ឈ្មោះ ស៊ុម ឡុងហៃ ភេទប្រុស អាយុ២៤ឆ្នាំ មុខរបរមិនពិតប្រាកដ មានទីលំនៅបច្ចុប្បន្នផ្ទះជួល ភូមិថ្នល់ទទឹង ឃុំតំណាក់អំពិល ស្រុកអង្គស្នួល ខេត្តកណ្តាល។
វត្ថុតាងដកហូតរួមមាន ថ្នាំញៀន(ម៉ាទឹកកក) ចំនួន ១២កញ្ចប់ ស្មើនឹង៣២.២៣ក្រាម ទូរសព្ទដៃ ចំនួន២គ្រឿង ម៉ូតូ១គ្រឿង និងសម្ភារៈវេចខ្ចប់និងប្រើប្រាស់មួយចំនួនទៀត។

បច្ចុប្បន្ន ជនសង្ស័យរួមទាំងវត្ថុតាង ត្រូវបានបញ្ជូនទៅសាលាដំបូងខេត្តដើម្បីសាកសួរ និងចាត់ការបន្តតាមនីតិវិធីច្បាប់៕