ភ្នំពេញ: ស្រ្តីម្នាក់បានធ្វើដំណើរមកប្ដឹងប៉ូលិសប៉ុស្ដិ៍ចោមចៅ សុំឲ្យជួយអន្តរាគន៍ស្វែងរកប្ដីរបស់គាត់ កាលពីវេលាម៉ោង៩ ព្រឹកថ្ងៃទី១៦ ខែឧសភា ឆ្នាំ២០១៧ ដោយគាត់បានប្រាប់ថា ប្ដីគាត់បានទិញសត្វទាអ្នកជិត ខាងយកទៅចិញ្ចឹមនៅឯស្រុកក្នុងខេត្តតាកែវ ហើយក៏ស្រាប់តែបាត់ខ្លួនដោយគ្មាន មូលហេតុរយ:ពេល២ថ្ងៃ កន្លងមកហើយ មិនឃើញត្រឡប់មកផ្ទះវិញសោះ ដោយមិនដឹងថាប្ដីទៅណា និងមានរឿងអ្វីឡើយ។ ដែលជាហេតុធ្វើឲ្យគាត់មានការព្រួយបារម្ភយ៉ាងខ្លាំង ខ្លាចប្ដីមានគ្រោះថ្នាក់ឬត្រូវមិត្តភក្ដិល្បួងនាំទៅធ្វើបាបយកម៉ូតូ ព្រោះពេលចាកចេញទៅ ប្ដីនាងបានជិះម៉ូតូ១គ្រឿងទៅជាមួយផងដែរ។

ស្រ្តីខាងលើឈ្មោះ វន សាមាស អាយុ៣៣ឆ្នាំ មុខរបរកម្មការិនីរោងចក្រកាត់ដេរ ស្នាក់នៅក្នុងភូមិកប់គង សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅក្នុងភូមិព្រៃញី ឃុំដូនព្រំ ស្រុកសំពៅមាស ខេត្តពោធិ៍សាត់។ ចំណែកបុរសជាប្ដីដែលបាត់ខ្លួននោះឈ្មោះ ង៉ែត រ៉ាមី អាយុ២៩ឆ្នាំ មុខរបរបើកបររថយន្ត ស្នាក់នៅក្នុងភូមិជាមួយគ្នា មានស្រុកកំណើតនៅក្នុងភូមិទួលត្បែង ឃុំលាយបូរណ៍ ស្រុកត្រាំកក់ ខេត្តតាកែវ ប៉ុន្ដែបានឈប់ពីការងារបើករថយន្ត រយ:ពេល១អាទិត្យកន្លងមកហើយ។

ម៉ូតូដែលប្តីជិះចេញទៅនោះម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅពាក់ស្លាកលេខ តាកែវ1K- 6327។

ស្រ្តីរូបនោះបាននិយាយថា នាងនិងបុរសជាប្ដីនោះ បានរៀបការជាមួយគ្នារយ:ពេល៤ឆ្នាំកន្លងមកហើយ ប៉ុន្តែអត់មានកូននោះឡើយ ក្រោយពេលរៀបការគាត់ធ្វើជាកម្មការិនីរោងចក្រកាត់ដេរ ចំណែកប្ដីបានធ្វើជា អ្នកបើកបររថយន្ត និងបានស្នាក់នៅជាមួយគ្នានៅក្នុងភូមិកប់គងនោះ។ដោយឡែកនៅថ្ងៃទី១៤ ខែឧសភា ឆ្នាំ២០១៧ ខណ:គាត់ចេញទៅធ្វើការបាត់ ប្ដីបានចេញពីផ្ទះបាត់ដែរដោយបានយកសត្វទា ទើបនិងទិញពីអ្នក ជិតខាងទៅទុកចិញ្ចឹមនៅឯស្រុកក្នុងខេត្តតាកែវ។ រហូតដល់ម៉ោងជាង៩ព្រឹកថ្ងៃដដែល គាត់បានខលទៅប្ដីប្រាប់ថាយកទាទៅដល់ផ្ទះនៅឯស្រុកហើយ និងរៀបចំត្រឡប់ទៅវិញហើយ ប៉ុន្តែក្រោយពេលចេញពីធ្វើការវិញ ម៉ោងជាង១១ អត់ឃើញប្ដីនៅផ្ទះគាត់បានខលទៅម្ដងទៀត ស្រាប់តែខលអត់ចូលឡើយ ទើបនៅវេលាម៉ោង២រសៀលថ្ងៃ ដដែលនោះគាត់បានខលទៅម្ដាយក្មេក ម្ដាយប្រាប់ថាប្ដីគាត់ហូបបាយរួចចេញទៅបាត់យូរហើយ ប៉ុន្ដែគាត់មិនបានឃើញប្ដីមកឡើយគឺបានបាត់រហូតមិនដឹងថាទៅដល់ណានោះទេ។

ស្រ្តីរូបនោះបានបន្តទៀតថា លុះដល់ថ្ងៃទី១៥ ខែឧសភា គាត់បានខលទៅសួរមិត្តភក្ដិប្ដីដែលធ្លាប់ដើរលេង ជាមួយគ្នាប្រាប់ថា ប្ដីនាងបានឡើងទៅភ្នំពេញវិញហើយ ដើម្បីរកការងារធ្វើនៅ ម្ដុំផ្សារថ្មី ពេលនោះ នាងបានពឹងឲ្យជូននាងទៅរកប្ដី ប៉ុន្តែមិត្តភក្ដិប្ដីនោះប្រាប់ថាអត់បានទេ ចាំស្អែក (ថ្ងៃទី១៦)ទើបជូនបាន លុះដល់ថ្ងៃនោះនាងខលទៅម្ដងទៀត ស្រាប់តែបិទទូរសព្ទបាត់ទៅហើយខលមិនចូលឡើយ។ គាត់មានការបារម្ភខ្លាចប្ដីត្រូវមិត្តភក្ដិ ល្បួងទៅធ្វើបាបយកម៉ូតូ ហើយដោយសារតែបែបនេះទើប គាត់សម្រេចចិត្តទៅប្ដឹងសុំការអន្តរាគមន៍ពីកម្លាំងនគរបាល ឲ្យជួយស្វែងរកប្ដីនាងផងព្រោះពេលនេះគាត់ មិនអាចទាក់ទងប្ដីបានឡើយ៕