ភ្នំពេញៈ នគរបាលខណ្ឌសែនសុខ ឆ្មក់បង្ក្រាបនិងឃាត់ខ្លួនអ្នកញៀនល្បែងជល់មាន់បាន៦នាក់ នៅសង្កាត់ឃ្មួញកាលពីវេលម៉ោង១២និង៣០នាទីថ្ងៃទី១៦ ខែឧសភា ឆ្នាំ២០១៧ នៅចំណុចដីឡូតិ៍វាលមួយកន្លែងស្ថិតក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។

សមត្ថកិច្ចបានឲ្យដឹងថា មនុស្សទាំង៦នាក់ដែលឃាត់ខ្លួននោះទី១ឈ្មោះ កុច សឿន ភេទប្រុស អាយុ៤៦ឆ្នាំ មុខរបរលក់ដូរ ស្នាក់នៅភូមិសែនសុខ២សង្កាត់ឃ្មួញ ខណ្ឌសែនសុខ ,ទី២ឈ្មោះ វ៉ាន់ យូ ភេទប្រុស អាយុ៣៨ឆ្នាំ មុខរបរបើកបរ ស្នាក់ភូមិសែនសុខ៧ សង្កាត់ឃ្មួញ ខណ្ឌសែនសុខ ,ទី៣ឈ្មោះ ស្រិន រ៉ែន ភេទប្រុស អាយុ២៧ឆ្នាំ មុខរបរជាងជុសជុលរថយន្តស្នាក់នៅខណ្ឌព្រែកព្នៅ ,ទី៤ឈ្មោះ លី ផៃ ភេទប្រុស អាយុ២៦ឆ្នាំ មុខរបរជាងជុសជុលរថយន្ត ស្នាក់នៅខណ្ឌព្រែក ,ទី៥ឈ្មោះ ម៊ុត ថុន ភេទប្រុស អាយុ៥២ឆ្នាំ មុខរបរកសិករ ស្នាក់នៅភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ និងទី៦ឈ្មោះ សួន រំចេក ភេទប្រុស អាយុ៤៥ឆ្នាំ មុខរបរនៅផ្ទះ ស្នាក់នៅភូមិទំនប់កប់ស្រូវ សង្កាត់គោករការ ខណ្ឌព្រែកព្នៅ។

ប្រភពព័ត៌មានបានឲ្យដឹងថា មុននឹងធ្វើការបង្ក្រាបក្រុមអ្នកញៀនល្បែងស៊ីសងជល់មាន់នេះគឺដោយសារមានពលរដ្ឋល្អបានរាយការណ៍ប្រាប់ថានៅចំណុចទីតាំងខាងលើមានអ្នកញៀនល្បែងស៊ីសងជល់មាន់បានមកប្រមូលផ្តុំគ្នាលេងយ៉ាងសប្បាយស្ទើរាល់ថ្ងៃ ទើបសមត្ថកិច្ចខណ្ឌក្រោមការបញ្ជាពីលោក ម៉ក់ ហុង អធិការនគរបាលខណ្ឌ បានដឹកនាំកម្លាំងចុះធ្វើការបង្ក្រាបតែម្តង។
លោក គួក សុខហួ អធិការរង នគរបាលខណ្ឌបានឲ្យដឹងថា បន្ទាប់ពីទទួលបានបទបញ្ជាលោក វរសេនីយ៍ឯក ម៉ក់ ហុង អធិការភ្លាមលោកបានដឹកនាំកម្លាំងផ្ទាល់ចុះទៅដល់ទីតាំងហើយបានឃើញពួកគេកំពុងតែលេងល្បែងភ្នាល់(ជល់មាន់)ទើបឃាត់ខ្លួនបានចំនួន៦នាក់ មាន់១ក្បាល ក្នាយ២គួស្មើរនិង៤ ជញ្ជើងថ្លឹងសត្វមាន់១ ស៊ុមសម្រាប់ក្រុងមាន់១ និងម៉ូតូ៤គ្រឿង។

បច្ចុប្បន្នអ្នកញៀនល្បែងទាំង៦នាក់រួមនិងវត្ថុតាងកំពង់ឃាត់ខ្លួនជាបណ្តោះអាសន្ននៅអធិការរដ្ឋាននគរបាលខណ្ឌសែនសុខដើម្បីចាត់ការតាមនិតិវិធី៕