កណ្តាល: មានការភ្ញាក់ផ្អើលទាំងព្រឹក ខណ:ដែលបុរសម្នាក់ដេកៗ ស្រាប់តែខ្យល់គស្លាប់នៅក្នុងបន្ទប់ដេករបស់ខ្លួន។

ហេតុការណ៍នេះបានកើតឡើងនៅវេលាកាលម៉ោង៧និង១០នាទី ព្រឹកថ្ងៃទី១៧ ខែឧសភា ឆ្នាំ២០១៧ នៅចំណុចលើគ្រែ ដេកក្នុងបន្ទប់ស្នាក់នៅរោងជាងរថយន្តរបស់ឈ្មោះ ម៉ឹង ណម ក្នុងភូមិទួលក្រសាំង ឃុំរកាខ្ពស់ ស្រុកស្អាង ខេត្តកណ្តាល។

លោក សេង សុជាតិ អធិការនគរបាលស្រុកស្អាងបានប្រាប់ឲ្យដឹងថា ជនរងគ្រោះឈ្មោះ ឈួន គឹមសេង ភេទប្រុស អាយុ២៩ឆ្នាំ មានទីលំនៅភូមិបន្ទាយនាង ឃុំបន្ទាយនាង ស្រុកមង្គលបុរី ខេត្តបន្ទាយមានជ័យ មុខរបរជាងជួសជុលរថយន្ត ។

លោកអធិការបានបញ្ជាក់ទៀតថា នៅថ្ងៃកើតហេតុ ឈ្មោះង៉ែត ចេក បានគោះទ្វារបន្ទប់របស់ជនរងគ្រោះតែមិនភ្ញាក់ ក៏បើកមុងមើលអង្រួនជើងនៅតែមិនងើប ក៏ស្រែកហៅគ្នាមកមើលជនរងគ្រោះ ក៏ឃើញជនរងគ្រោះបានស្លាប់បាត់ទៅហើយ រួចក៏បានរាយការណ៍ដល់សមត្ថកិច្ច លោកគ្រូពេទ្យកម្លាំងជំនាញពិនិត្យហេតុការណ៍ ខេត្ត ស្រុក ប៉ុស្តិ៍ ក្រុមប្រឹក្សាឃុំមេភូមិ បានធ្វើការពិនិត្យសពពុំមានស្នាកស្នាមអ្វីគួរឲ្យកត់សម្គាល់ឡើយ។ តាមការបញ្ជាក់របស់លោកគ្រូពេទ្យ គឺជនរងគ្រោះពិតជាស្លាប់ដោយសារ ជំងឺ ខ្យល់គមែន។

តាមការបញ្ជាក់របស់ឈ្មោះ វុធ ផល្លា ដែលដេកនៅក្បែរបន្ទប់ជនរងគ្រោះថា នៅថ្ងៃកើតហេតុខាងលើម៉ោងប្រមាណជា៤និង០៥នាទីទៀបភ្លឺ ឮសូរសម្លេងជនរងគ្រោះដូចស្រមុក(ឃូខកៗ)លុះដល់ម៉ោង៧និង១០នាទីទើបដឹងជនរងគ្រោះស្លាប់ ។

ក្រោយពេលពិនិត្យរួច សពត្រូវបានប្រគល់ជូនក្រុមគ្រួសារធ្វើបុណ្យតាមប្រពៃណី៕