ភ្នំពេញ: កាលពីរសៀល ថ្ងៃទី១៦ ខែឧសភា ឆ្នាំ២០១៧ កម្លាំងសមត្ថកិច្ចនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ និងមន្ត្រីជំនាញនាយកដ្ឋានឱសថ នៃក្រសួងសុខាភិបាល ដឹកនាំដោយលោក ស្រី ម៉ាក់នី ព្រះរាជអាជ្ញារងតំណាងអយ្យការសាលាដំបូងរាជធានីភ្នំពេញ បានបើកប្រតិបត្តិការ ឆែកឆេរទីតាំងមួយកន្លែង នៅចំណុចផ្ទះលេខ៧៤BEo ផ្លូវលេខ២០២ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ។

មុននឹងឈានដល់ការចុះបង្ក្រាបបានបទល្មើសខាងលើ កម្លាំងសមត្ថកិច្ចនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ បានបើកការស្រាវជ្រាវ រកឃើញថា ទីតាំងមួយកន្លែងមានឈ្មួញជនជាតិវៀតណាមម្នាក់ នាំទំនិញអត់បង់ពន្ធ និងក្លែងក្លាយជាច្រើនប្រភេទដូចជាថ្នាំពេទ្យ ឡេខាត់ស្បែកគ្រប់ប្រភេទ ដែលមានចំនួន៥តោន ពីប្រទេសវៀតណាមដោយខុសច្បាប់ និងយកមកស្តុកទុកនៅក្នុងទីតាំងខាងលើ ដើម្បីចែកចាយលើទីផ្សារក្នុងព្រះរាជាណាចក្រកម្ពុជា ។

ជាក់ស្តែងក្នុងប្រតិបត្តិការខាងលើ សមត្ថកិច្ចធ្វើការឃាត់ខ្លួនបានជនសង្ស័យម្នាក់ ជាស្រ្តីជនជាតិវៀតណាម ដែលជាម្ចាស់ទំនិញខាងលើ នាំខ្លួនទៅកាន់នាយកដ្ឋាននគរបាលប្រឆាំងបទល្មើសសេដ្ឋកិច្ច ដើម្បីចាត់ការតាមនីតិវិធីច្បាប់បន្តទៀត៕

//youtu.be/SZQGjkHp9Dw