ពោធិ៍សាត់: លោកវរសេនីយ៍ត្រី ធាង ឡេង អធិការនគរបាលស្រុកវាលវែង បានប្រាប់Post Newsថា ជនសង្ស័យចំនួន៦នាក់ ត្រូវបានកម្លាំងនគរបាលស្រុកធ្វើការចាប់ខ្លួន ក្រោយពីស្រាវជ្រាវនិងត្រួតពិនិត្យរកឃើញមានការជាប់ពាក់ពន្ធ័នឹងករណីប្រើប្រាស់និងរក្សាទុកនូវសារធាតុញៀនខុសច្បាប់។

ការបង្ក្រាបនេះធ្វើឡើងកាលពីវេលាម៉ោង៩និង២នាទី យប់ថ្ងៃទី២៤ ខែឧសភា ឆ្នាំ២០១៧ ស្ថិតនៅចំណុចក្បែរផ្ទះសំណាក់គីស្រីអូន ភូមិប្រម៉ោយ ឃុំប្រម៉ោយ ស្រុកវាលវែង ខេត្តពោធិ៍សាត់។

ការឃាត់ខ្លួនជនសង្ស័យទាំងនេះ ដំបូងឡើយសមត្ថកិច្ចឃាត់ខ្លួនបានជនសង្ស័យ២នាក់ ទី១មានឈ្មោះ អឿន សំអុល ភេទប្រុស អាយុ២២ឆ្នាំ និងទី២ឈ្មោះ ឡុង ដារ៉ារិទ្ធ ភេទប្រុស អាយុ២៨ឆ្នាំ អ្នកទាំង២ស្នាក់នៅក្នុងភូមិកើតហេតុខាងលើ។ ដកហូតបាន ក្រាមពណ៌សថ្លាសង្ស័យជាសារធាតុញៀនចំនួន៨កញ្ចប់ ក្នុងនោះមាន៧កញ្ចប់តូចនិង១កញ្ចប់ធំ, ទូរសព្ទចុចពិលចំនួន២គ្រឿង, លុយចំនួន ១៦៧,៤០០រៀល, ម៉ាស៊ីនថ្លឹង១ ,កាបូបស្ពាយ១ និងកាំបិតឡាម១ផងដែរ។

លុះដល់ថ្ងៃទី២៥ ខែឧសភា ឆ្នាំ២០១៧ សមត្ថកិច្ចបានសួរចម្លើយជនសង្ស័យទាំង២នាក់ខាងលើ រហូតឈានទៅដល់ការឃាត់ខ្លួនជនសង្ស័យចំនួន៤នាក់បន្ថែមទៀត ទី១មានឈ្មោះ ហេង រតន: ភេទប្រុស អាយុ២០ឆ្នាំ ,ទី២ឈ្មោះ ណៃ សី ភេទប្រុស អាយុ២១ឆ្នាំ ទាំង២នាក់ស្នាក់នៅក្នុងភូមិខាងលើ, ទី៣ឈ្មោះ ឡុង រ៉ា ភេទប្រុស អាយុ២៦ឆ្នាំ , ទី៤ឈ្មោះ ខុន ឌឿន ភេទប្រុស អាយុ១៨ឆ្នាំ ទាំង២នាក់ស្នាក់ចំណុចអូរក្របីងាប់ ភូមិនាយលូក ឃុំអូរសោម។

បច្ចុប្បន្នជនសង្ស័យទាំង៦នាក់ខាងលើត្រូវបានសមត្ថកិច្ចធ្វើការសាកសួរ និងកសាងសំណុំរឿងបញ្ជូនខ្លួនទៅកាន់សាលាដំបូងខេត្តចាត់ការតាមនីតិវិធីច្បាប់៕

//youtu.be/GK4UW4NmFAY