ភ្នំពេញៈ ជនសង្ស័យ២នាក់ ត្រូវបានសមត្ថកិច្ចឃាត់ខ្លួន បន្ទាប់ធ្វើសកម្មភាពឆក់កាបូបស្រ្តីម្នាក់បានសម្រេច ។
ហេតុការណ៍នេះកើតឡើងកាលពីវេលាម៉ោង១០យប់ ថ្ងៃទី២៥ ខែឧសភាឆ្នាំ២០១៧ ស្ថិតនៅមុខវត្ដសារ៉ាវ័ន្ដ សង្កាត់ជ័យជំនះ ខណ្ឌដូនពេញ រាជធានីភ្នំពេញ ។

ជនរងគ្រោះឈ្មោះ នាង វ៉ាន់ថា អាយុ៣៩ឆ្នាំ ស្នាក់នៅផ្ទះជួលផ្សារចាស់ សង្កាត់ផ្សារចាស់ ខណ្ឌដូនពេញ ។

តាមសម្ដីស្ដ្រីរងគ្រោះបានឲ្យដឹងថា មុនពេលកើតហេតុ ស្ដ្រីខាងលើបានដើរមកពីញ៉ាំអីនៅសូរិយា រួចបានដើរទៅផ្ទះវិញតាមបណ្ដោយផ្លូវ១៧២ លុះដើរដល់មុខវត្ដសារ៉ាវ័ន្ដ ស្រាប់តែលេចមុខជនសង្ស័យ២នាក់ជិះម៉ូតូមួយគ្រឿងម៉ាក ហុងដាឌ្រីម សេ១២៥ ពាក់ស្លាកលេខ ភ្នំពេញ1FI-4629ជិះគ្នា២នាក់បានធ្វើសកម្មភាពឆក់កាបូបពីស្ដ្រីម្នាក់បានសម្រេច រួចក៏មានអ្នកឃើញហេតុការណ៍បានជិះដេញតាមពីក្រោយរហូតមកដល់មុខសាលានរោត្ដមបានជិះទៅបុកនិងរថយន្ដមួយគ្រឿងបណ្ដាលឲ្យដួល ទើបប្រជាពលរដ្ឋបាននាំគ្នាស្វាគមន៍មួយចាស់ដៃតែម្ដង រួចបានប្រគល់ឲ្យសមត្ថកិច្ចតាមក្រោយ ។

ក្រោយពេលកើតហេតុសមត្ថកិច្ចចុះទៅយកជនសង្ស័យម្នាក់មកកាន់ប៉ុស្ដិ៍នគរបាលរដ្ឋបាលជ័យជំនះនិងម្នាក់ទៀតត្រូវបានរថយន្ដសង្គ្រោះបន្ទាន់នៃមន្ទីរពេទ្យកាល់ម៉ែត្រមកយកទៅសង្គា្រះ ។

បច្ចុប្បន្នសមត្ថកិច្ចកំពុងសាកសួរនិងកសាងសំណុំរឿងបញ្ជូនទៅកាន់អធិការដ្ឋាននគរបាលខណ្ឌដូនពេញ ដើម្បីចាត់ការតាមនីតិវិធី ៕