កណ្ដាល: នៅថ្ងៃទី២៨ ខែឧសភា សមត្ថកិច្ចបានឃាត់ខ្លួនបុរសពីរនាក់ ពាក់ព័ន្ធនឹងករណីជួញដូរថ្នាំញៀន នៅចំណុចរោងលក់ពោតស្ងោរ ឈ្មោះ អ៊ូ ឡាំ ក្នុងភូមិសាមគ្គី ឃុំព្រែកដំបង ស្រុកមុខកំពូល ខេត្តកណ្ដាល ។

ជនសង្សយ័ពីរនាក់ ទី១.ឈ្មោះ ញិល ល័ក្ខ ហៅ សៅ ភេទប្រុស អាយុ ២៤ឆ្នាំ នៅភូមិក្រោម ឃុំព្រែកអញ្ចាញ ស្រុកមុខកំពូល កណ្ដាល មុខរបរ មិនពិតប្រាកដ និងទី២.ឈ្មោះ នី ពិសី ភេទប្រុស អាយុ ២៥ឆ្នាំ នៅភូមិព្រែកតាសោម ឃុំឫស្សីជ្រោយ ស្រុកមុខកំពូលខេត្តកណ្ដាល មុខរបរ មិនពិតប្រាកដ ។

វត្តុតាងចាប់យករួមមាន ម្សៅក្រាមពណ៌សថ្លា ០៤កញ្ចប់តូច សង្ស័យជាសារធាតុញៀន, ទូរស័ព្ទម៉ាកកណូគា ០២គ្រឿង, ម៉ូតូម៉ាកសេ១២៥ ពណ៌ខ្មៅពាក់ស្លាកលេខ ភ្នំពេញ1CH -0245 ផលិតឆ្នាំ២០១៥ មួយគ្រឿង ។

សមត្ថកិច្ចបានឲ្យដឹងថា នៅថ្ងៃកើតហេតុខាងលើ ឈ្មោះ ញិល លក្ខ័ ហៅ សៅ បានទៅឌុបឈ្មោះ នី ពិសី នៅភូមិអញ្ជែងក្រោម ឃុំពុកឫស្សី ស្រុកខ្សាច់កណ្ដាល ពេលជិះមកដល់ភូមិព្រែកតាសោម ឃុំឫស្សីជ្រោយ ស្រុកមុខកំពូល ឈ្មោះ នី ពិសីបានឈប់ ដោយយកខោអាវទៅទុកនៅផ្ទះយាយរបស់ខ្លួន រួចបានជិះទៅហូបពោតស្ងោរនៅកន្លែងកើតហេតុ អង្គុយហូបពោតបានមួយ ស្រាប់តែមានមនុស្សទូរស័ព្ទ មករកទិញថ្នាំញៀនពីជនសង្ស័យឈ្មោះញិល ល័ក្ខ ហៅ សៅ នៅពេលនោះ ជនសង្ស័យបានប្រាប់ថា ឲ្យមកយកនៅរោងលក់ពោតស្ងោរ ជិតគល់ស្ពានលេខ១៤ ។ មួយសន្ទុះក្រោយមកសមត្ថកិច្ច បានមកឃាត់ខ្លួនជនសង្ស័យទាំង០២នាក់ ធ្វើការត្រួតពិនិត្យ ឆែកឆេរ ចាប់យកបានវត្ថុតាងខាងលើ រួចបញ្ចូនមកអធិ
ការដ្ឋាននគរបាលស្រុកមុខកំពូល ដើម្បីបន្តចាត់ការតាមនីតិវិធី ៕