ភ្នំពេញ: រថយន្តសាំយ៉ុងដឹកទឹកសុទ្ធ១គ្រឿង បានបើកបរក្នុងល្បឿនលឿន ហើយបានជ្រុលទៅបុកម៉ូតូម៉ាក ហុងដាឌ្រីមសេ១២៥មួយគ្រឿងទៀត បន្ទាប់មកបានជ្រុលទៅធ្លាក់ចូលទៅក្នុងប្រឡាយទឹកទាំងអស់គ្នា ហើយបណ្ដាលឲ្យអ្នកជិះម៉ូតូរងរបួសបែកក្បាលយ៉ាងដំណំ ហើយម៉ូតូបានរងការខូចខាតទាំងស្រុងផងដែរ ចំណែកអ្នកបើកបររថយន្តបានរងរបួសបន្តិចបន្តួចប៉ុណ្ណោះ។

ហេតុការណ៍គ្រោះថ្នាក់ចររាចរណ៍នេះ បានកើតឡើងកាលពីវេលាម៉ោង៨ព្រឹក ថ្ងៃទី២៩ ខែឧសភា ឆ្នាំ២០១៧ នៅលើកំណាត់ផ្លូវព្រៃស ត្រង់ចំណុចមុខវត្តឫស្សីសាញ់ ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ។

រថយន្តសាំយ៉ុងខាងលើ ពណ៌ស ពាក់ស្លាកលេខ ភ្នំពេញ 2AD-2111 បើកបរបុរសម្នាក់ឈ្មោះ សុខ រ៉ាយុទ្ធ អាយុ៣៤ឆ្នាំ ស្នាក់នៅក្នុងសង្កាត់បឹងទំពុន ខណ្ឌមានជ័យ បានបុកអ្នកជិះម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៦ ពណ៌ខ្មៅគ្មានស្លាកលេខ១គ្រឿង បើកបរដោយយុវជនម្នាក់ឈ្មោះ ហៃ គឹមអាត អាយុ២១ឆ្នាំ មុខរបរជាងសំណង់ រងរបួសបែកក្បាល ស្នាក់នៅសង្កាត់ទឹកថ្លា ខណ្ឌសែនសុខ។

តាមប្រភពព័ត៌មានបានឲ្យដឹងថា នៅមុនពេលកើតហេតុ រថយន្តបង្កបានបើកបរធ្វើដំណើរក្នុងទិសដៅពីលិចទៅកើតក្នុងល្បឿនលឿន ចំណែកម៉ូតូរងគ្រោះបានបើកបរធ្វើដំណើរ ក្នុងទិសដៅពីជើងទីត្បូង លុះទៅដល់ត្រង់ចំណុចកើតហេតុខាងលើ រថយន្តក៏បានជ្រុលទៅបុកម៉ូតូពេញទំហឹង និងជ្រុលធ្លាក់ចូលទៅក្នុងប្រឡាយទឹកទាំងកម្រោលទាំងអស់គ្នាតែម្ដង ខណ:នោះ អ្នកជិះម៉ូតូបានលូនចេញពីក្នុងទឹក ក្រោមរថយន្តយ៉ាងត្រដាបត្រដួស ក្នុងស្ថានភាពរបួសបែកក្បាលយ៉ាងដំណំ ចំណែករថយន្តមិនបានក្រឡាប់នោះឡើយ។

ក្រោយពេលកើតហេតុ នគរបាលមូលដ្ឋានបានចុះទៅធ្វើការវាស់វែង ប៉ុន្តខណ:នោះ ភាគីទាំងពីរបាន ធ្វើការសម្របសម្រួលគ្នា ដើម្បីបញ្ចប់រឿងនៅកន្លែងកើតហេតុនោះហើយ៕

//youtu.be/oJnjPbIgibI