ភ្នំពេញ: កម្លាំងនគរបាលព្រហ្មទណ្ឌខណ្ឌ៧មករា សហការជាមួយកម្លាំងនគរបាលនៃស្នងការដ្ឋាននគរបាលខេត្តកំពង់ចាម ការិយាល័យព្រហ្មទណ្ឌកម្រិតធ្ងន់ បានឃាត់ខ្លួនជនសង្ស័យម្នាក់ ពីបទឃាតកម្ម។

នៅវេលាម៉ោង១រសៀលថ្ងៃទី៣០ ខែឧសភា ឆ្នាំ២០១៧ ជនសង្ស័យ ឈ្មោះ រៀម ចាន់ដា ហៅខុង ភេទប្រុស អាយុ២២ឆ្នាំ ទីកន្លែងកំណើត នៅភូមិតាកែវ ឃុំគរ ស្រុកព្រៃឈរ ខេត្តកំពង់ចាម ត្រូវបានកម្លាំងនគរបាលព្រហ្មទណ្ឌខណ្ឌ៧មករា សហការជាមួយកម្លាំងនគរបាលនៃស្នងការដ្ឋាននគរបាលខេត្តកំពង់ចាម ការិយាល័យព្រហ្មទណ្ឌកម្រិតធ្ងន់ បានឃាត់ខ្លួនជនសង្ស័យខាងលើ នៅចំណុចវត្ដសំពៅមាស នៅកុដិលេខ៤ ក្នុងសង្កាត់បឹងព្រលឹត ខណ្ឌ៧មករា រាជធានីភ្នំពេញ តាមដីការបញ្ជាឲ្យចូលខ្លួន របស់លោក ហួត វុទ្ធី ព្រះរាជអាជ្ញាអមសាលាដំបូងខេត្តកំពង់ចាម ពីបទឃាតកម្ម ដែលបានប្រព្រឹត្តិកាលពីថ្ងៃទី១៥ ខែមេសា ឆ្នាំ២០១៦ នៅចំណុចភូមិក្រោយវត្ត ឃុំគរ ស្រុកព្រៃឈរ ខេត្តកំពង់ចាម។

តាមប្រភពព័ត៌បានឲ្យដឹងថាកាលពីថ្ងៃទី១៥ ខែមេសា ឆ្នាំ២០១៦ នៅមុនពេលកើតហេតុ ជនសង្ស័យនិងជនរងគ្រោះបានមានជម្លោះគ្នានៅវត្ត ពេលកំពុងរាំធុងបាស ពេលនោះជនសង្ស័យក៏បានយកកាំបិតមកចាក់បណ្ដាលឲ្យជនរងគ្រោះស្លាប់តែម្ដង។ បន្ទាប់ពីបានប្រព្រឹត្តិបទល្មើសរួច ជនសង្ស័យបានរត់គេចខ្លួនបាត់អស់រយ:ពេលជាង១ឆ្នាំ រហូតមកដល់រសៀលថ្ងៃទី៣០ ខែឧសភា ឆ្នាំ២០១៧នេះ ត្រូវបានកម្លាំងនគរបាលនៃស្នងការដ្ឋាននគរបាលខេត្តកំពង់ចាម ការិយាល័យព្រហ្មទណ្ឌកម្រិតធ្ងន់ សហការជាមួយកម្លាំងនគរបាលព្រហ្មទណ្ឌខណ្ឌ៧មករា ឃាត់ខ្លួនបានតែម្ដង។

បច្ចុប្បន្នជនសង្ស័យរូបនេះត្រូវបានកម្លាំងនគរបាលព្រហ្មទណ្ឌខណ្ឌ៧មករាបានប្រគល់ជូនកម្លាំងនគរបាលខេត្តកំពង់ចាមដើម្បីចាត់ការតាមនីតិវិធីច្បាប់៕