ភ្នំពេញ: រថយន្តក្រឡុកបេតុងជាច្រើនគ្រឿងកំពុងតែបើកបរចេញចូលចាក់បេតុងនៅក្នុងការដ្ឋានមួយកន្លែង ហើយមិនបានធ្វើការសម្អាតកង់ឲ្យបានស្អាតនោះទេ បានធ្លាក់ដីធ្វើឲ្យប្រឡាក់ផ្លូវយ៉ាងខ្លាំង តែអាជ្ញាធរខណ្ឌចម្ការមនហាក់បីដូចជាមិនដឹងមិនឮសោះឡើយ។

នៅព្រឹកថ្ងៃទី៣១ ខែឧសភា ឆ្នាំ២០១៧នេះ នៅលើកំណាត់ផ្លូវព្រះនរោត្តមរហូតជិតដល់វិមានឯករាជ្យ គេឃើញមានដីធ្លាក់រប៉ាត់រប៉ាយរាយពេញផ្លូវរាប់រយម៉ែត្រ ដោយសារតែមានរថយន្តក្រឡុកបេតុងជាច្រើនគ្រឿងកំពុងតែបើកបរចេញចូលចាក់បេតុងនៅក្នុងការដ្ឋានមួយកន្លែង ហើយមិនបានធ្វើការសម្អាតកង់ឲ្យបានស្អាតនោះទេ បានធ្លាក់ដីធ្វើឲ្យប្រឡាក់ផ្លូវយ៉ាងខ្លាំង តែអាជ្ញាធរខណ្ឌចម្ការមនហាក់បីដូចជាមិនដឹងមិនឮសោះឡើយ។

ការដ្ឋានសំណង់មួយកន្លែងដែលមានទីតាំងនៅតាមបណ្តោយផ្លូវព្រះនរោត្តមដែលកំពុងធ្វើការសាងសង់ បានធ្វើការបំផ្លាញផ្លូវព្រះនរោត្តមយ៉ាងខ្លាំង ដោយធ្វើឲ្យធ្លាក់ដីប្រឡាក់ពេញផ្លូវរាប់រយម៉ែត្រ តែគេពុំបានឃើញមានវត្តមានរបស់អាជ្ញាធរមូលដ្ឋានខណ្ឌចម្ការមនណាម្នាក់ចុះទៅមើលឡើយ ដោយបណ្តោយឲ្យរថយន្តក្រឡុកបេតុងបើកចេញចូល ទាំងមិនបានធ្វើការសម្អាតដីដែលនៅជាប់កង់ហើយធ្លាក់ប្រឡាក់ពាសពេញផ្លូវចាប់ពីខាងមុខការដ្ឋានខាងលើ រហូតដល់ចំណុចកែងនិងផ្លូវ២៩៤ ក្នុងសង្កាត់ទន្លេបាសាក់នោះ។

ជាចុងក្រោយ ប្រជាពលរដ្ឋក៏បានធ្វើការសំណូមពរទៅដល់អាជ្ញាធរខណ្ឌចម្ការមន មេត្តាចុះមកធ្វើការណែនាំដល់ម្ចាស់ទីតាំងខាងលើ ឲ្យធ្វើការលាងសំអាតកង់រថយន្តជាមុនសិនមុននឹងបើកបរចេញ ដើម្បីកុំឲ្យប្រឡាក់ផ្លូវបែបនេះតទៅទៀត៕