កណ្តាលៈ ករណីហិង្សារមួយកើតឡើង បន្ទាប់ពីបុរសម្នាក់ ទៅចូលរួមមង្គលការបងប្អូនរាំលេងសប្បាយ ត្រឡប់មកវិញត្រូវគេលបកាប់ បណ្តាលឲ្យរងរបួសយ៉ាងធ្ងន់ធ្ងរ។ ហេតុការណ៍នេះបានកើតឡើងកាលពីវេលាម៉ោង ១១និង៣០នាទី ថ្ងៃទី៣ ខែមិថុនា ឆ្នាំ២០១៧ ស្ថិតនៅចំណុចភូមិពុកឫស្សីកណ្ដាល ឃុំពុកឫស្សី ស្រុខ្សាច់កណ្ដាល ខេត្តកណ្តាល។

សមត្ថកិច្ចបានឲ្យដឹងថា ជនរងគ្រោះមានឈ្មោះ ហេង កុសល់ ភេទប្រុស អាយុ២៤ឆ្នាំ មុខរបរកសិករ ស្នាក់នៅភូមិ ពុកឫស្សីលើ ឃុំពុកឫស្សី ស្រុកខ្សាច់កណ្ដាល ខេត្តកណ្តាល រងរបួសចំក្បាល១កន្លែង និងខ្នងបោះដៃផុត២កន្លែង។

យោងតាមប្រភពព័ត៌មាន បានឲ្យដឹងថា មុនពេលកើតហេតុ ជនរងគ្រោះបានទៅចូលរួមពិធីមង្គលការបងប្អូននៅភូមិពុកឫស្សីកណ្ដាលឃុំ ពុកឬស្សី ដោយមានការ រាំធុងបាសអបអរសាទរមង្គលការខាងលើ រហូតដល់ម៉ោង១១យប់ ពេលរាំចប់ ជនរងគ្រោះ បានដើរមកផ្ទះម្នាក់ឯង ដើរមកដល់មុខផ្ទះឈ្មោះ ឡុង សុភា ស្រាប់តែមានជនមិនមុខលបកាប់បណ្តាលឲ្យរងបួស ហើយបានប្រឹងរត់មកដល់ផ្ទះត្រូវបានក្រុមគ្រួសារបញ្ជូនទៅព្យាលរបួសនៅមន្ទីរពេទ្យភ្នំពេញ។

ចំណែកជនសង្ស័យខាងលើ ដែលកំពុងរត់គេចខ្លួន សមត្ថកិច្ចកំពុងធ្វើការស្រាវជ្រាវតាមចាប់ខ្លួនយកមកផ្តន្ទាទោសតាមផ្លូវច្បាប់៕