ភ្នំពេញៈ សមត្ថកិច្ចខណ្ឌពោធិ៍សែនជ័យសហការជាមួយសមត្ថកិច្ចប៉ុស្តិ៍ត្រពាំងក្រសាំងបានឃាត់ខ្លួនជនសង្ស័យជួញដូរនិងប្រើប្រាស់គ្រឿងញៀនចំនួន៣នាក់ ដកហូតថ្នាំញៀន១កញ្ចប់តូច រួមទាំងឧបករណ៍ប្រើប្រាស់គ្រឿងញៀនមួយចំនួន។

ហេតុការណ៍នេះបានកើតឡើងកាលពីវេលាម៉ោង៩និង៣០នាទីព្រឹកថ្ងៃទី៨ ខែមិថុនាឆ្នាំ ២០១៧ ស្ថិតនៅចំណុចបន្ទប់ជួល ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។

ជនសង្ស័យទាំង៣នាក់នោះទី១ឈ្មោះ លី ទី ភេទប្រុស អាយុ២៥ឆ្នាំមុខរបរជាងធ្វើម្នាងសិលា ស្នាក់នៅផ្ទះជួល ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ ,ទី២ឈ្មោះ លី គីម ភេទប្រុស អាយុ២០ឆ្នាំ មុខរបរនៅផ្ទះ ស្នាក់នៅផ្ទះជួលភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ និងទី៣ឈ្មោះ ឈិន ចាន់ ភេទប្រុស អាយុ១៩ឆ្នាំ មុខរបរកម្មករសំណង់ ស្នាក់នៅផ្ទះជួលភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ។ ក្នុងនោះដកហូតបានមានជញ្ជីងសម្រាប់ថ្លឹងគ្រឿងញៀនចំនួន១គ្រឿងថ្នាំញៀនចំនួន១កញ្ចប់ថង់ល្មម,ទូរសព្ទដៃម៉ាក ណូគា ចំនួន២គ្រឿង ខ្មៅ១ បៃតង១,ដែកកេះចំនួន១,ថង់ប្លាស្ទិកសម្រាប់ច្រកគ្រឿងញៀនមួយចំនួន,កែវជ័រកែច្នៃសម្រាប់ជក់គ្រឿងញៀនចំនួន១។

បច្ចុប្បន្នជនសង្ស័យទាំង៣នាក់រួមនិងវត្ថុតាង ត្រូវបានកម្លាំងឃាត់នាំខ្លួនមកកាន់ផ្នែកជំនាញនៃអធិការដ្ធាននគរបាលខណ្ឌពោធិសែនជ័យ ដើម្បីសាកសួរនិងកសាងសុំណុំរឿងបញ្ចូនខ្លួនជនសង្ស័យឡើងតុលាចាត់ការទៅតាមនីតិវិធី៕