ព្រះសីហនុៈ លោកអធិការរងស្រុកព្រៃនប់ បានប្រាប់ Post News ថា មានករណីគ្រោះថ្នាក់ចរាចរណ៍មួយកើតឡើង បង្កដោយរថយន្តដឹកប្រេង១គ្រឿង បុកម៉ូតូពេញទំហឹង បណ្តាលឲ្យបុរសម្នាក់ស្លាប់នៅនឹងកន្លែងកើតហេតុ។

ហេតុការណ៍កើតឡើងនៅវេលាម៉ោង៦និង៣០នាទីព្រឹក ថ្ងៃទី៩ ខែមិថុនា ឆ្នាំ២០១៧ នៅលើផ្លូវសម្តេចសង្ឃទេពវង្ស ចន្លោះគីឡូម៉ែត្រ៦-៧ ស្ថិតនៅក្នុងភូមិអូរត្រជាក់ចិត្ត ឃុំសំរ៉ុង ស្រុកព្រៃនប់ ខេត្តព្រះសីហនុ។

មុនពេលកើតហេតុ គេឃើញរថយន្តម៉ាក FREIGTUNER ពណ៌ក្រហម លាយស ពាក់ស្លាកលេខ ភ្នំពេញ4A-1644 (ជាកម្មសិទ្ធរបស់ក្រុមហ៊ុន សូគីម៉ិច) មានទិសដៅពីវាលរេញ ឆ្ពោះទៅស្ទឹងហាវ (អ្នកបើកបររត់គេចខ្លួនបាត់ក្រោយពេលកើតហេតុ) លុះដល់ចំណុចខាងលើក៏បានបុកពីខាងក្រោយម៉ូតូ១គ្រឿងម៉ាកហុងដា វ៉េវ ពណ៌ក្រហម គ្មានស្លាកលេខ បើកបរដោយឈ្មោះ ខេន សុខណា ភេទប្រុស អាយុ១៨ឆ្នាំ មុខរបរ សិស្ស មានទីលំនៅភូមិឃុំកើតហេតុ ដែលមានទិសដៅស្របគ្នា បណ្ដាលឲ្យស្លាប់មនុស្សម្នាក់នៅនឹងកន្លែងកើតហេតុ។

ក្រោយពីកើតហេតុ សមត្ថកិច្ចបានចុះទៅដល់កន្លែងហេតុ ធ្វើការវាស់វែងនិងនាំយករថយន្តនិងម៉ូតូទាំង២គ្រឿង មករក្សាទុកនៅអធិការដ្ឋាននគរបាលស្រុកព្រៃនប់។ ចំណែកសាកសពត្រូវបានក្រុមគ្រួសារយកទៅធ្វើបុណ្យតាមប្រពៃណី៕