កណ្តាលៈ ករណីគ្រោះថ្នាក់ចរាចរណ៍ រវាងរថយន្ត និងរថយន្ត បណ្តាលឲ្យរបួសធ្ងន់២នាក់ ស្រាលម្នាក់ ខូចខាតរថយន្ត២គ្រឿង។

កើតហេតុនៅថ្ងៃទី៩ ខែមិថុនា ឆ្នាំ២០១៧ វេលាម៉ោង៩ព្រឹក នៅលើផ្លូវជាតិលេខ៦ ចន្លោះគីឡូមែត្រលេខ២១-២២ ស្ថិតក្នុងភូមិក្រោម ឃុំព្រែកអញ្ចាញ ស្រុកមុខកំពូល ខេត្តកណ្តាល។

មុនពេលកើតហេតុ គេឃើញរថយន្ត១គ្រឿងម៉ាកឡិចស៊ីស៤៧០ ពណ៌ខ្មៅ ពាក់ស្លាកលេខ ភ្នំពេញ2L-8319 បើកបរដោយឈ្មោះ ម៉ាទីន ភេទប្រុស អាយុ៣៧ឆ្នាំ ជនជាតិចិន មានទីលំនៅ ភូមិសាមគ្គីមានជ័យ សង្កាត់ប៉ោយបែត្រ ក្រុងប៉ោយបែត ខេត្តបន្ទាយមានជ័យ។ ដោយមានរួមដំណើរម្នាក់ ឈ្មោះវាន់ ស្រីអូន ភេទស្រី អាយុ២៣ ឆ្នាំ មានទីលំនៅជាមួយគ្នា។ បានធ្វើដំណើរ ពីជើងទៅត្បូង លុះមកដល់ចំណុចកើតហេតុបានមកបុករថយន្ត១គ្រឿង ម៉ាកហ៊ីយ៉ាន់ដាយ ពណ៌ស ពាក់ស្លាកលេខយ-1481ភព3 បើកបរដោយឈ្មោះសឹង គង់ ភេទប្រុស អាយុ៣៣ឆ្នាំ មានទីលំនៅភូមិឈើទាល ឃុំព្រែកអញ្ចាញ ស្រុកមុខកំពូល ខេត្តកណ្ដាល ដែលឈប់នៅលើទ្រូងផ្លូវក្នុងទិសដៅពីជើងទៅត្បូង បណ្ដាលឲ្យរបួសធ្ងន់ដល់ឈ្មោះសឹង គង់ និងឈ្មោះវាន់ ស្រីអូន និងរបួសស្រាលដល់ឈ្មោះ ម៉ាទីន ។

អ្នករបួសទាំង៣នាក់ បានបញ្ចូនទព្យាបាលនៅមន្ទីរពេទ្យភ្នំពេញ ចំណែករថយន្តទាំង២គ្រឿង បានយកមករក្សាទុកនៅអធិការដ្ឋាននគរបាលស្រុកមុខកំពូល ដើម្បីបន្តចាត់ការតាមនីតិវិធី៕