ភ្នំពេញៈ ជនសង្ស័យម្នាក់ ត្រូវបានកម្លាំងនគរបាលប៉ុស្តិ៍ទួលសង្កែ ធ្វើការឃាត់ខ្លួន ក្រោយពីជនសង្ស័យរូបនេះធ្វើការសកម្មភាពកាច់សោកម៉ូតូបានសម្រេច។

ហេតុការណ៍ឃាត់ខ្លួននេះកាលពីវេលាម៉ោង ១២និង៥០នាទីថ្ងៃត្រង់ ថ្ងៃទី៩ ខែមិថុនា ឆ្នាំ២០១៧ នៅចំណុចផ្ទះជួល ផ្លូវលំ ក្រុមទី១១ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។

ជនសង្ស័យមានឈ្មោះ យ៉ាវ យាន ភេទប្រុស អាយុ៣០ឆ្នាំ មុខរបរ មិនពិតប្រាកដ មានទីលំនៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ។ ចំណែកឯជនរងគ្រោះមានឈ្មោះ ស៊ន សែម ភេទប្រុស អាយុ ២៨ឆ្នាំ មុខរបរ លក់ទឹកត្រី មានទីលំនៅកន្លែងកើតហេតុខាងលើ។

សមត្ថកិច្ចបានឲ្យដឹងថា នៅវេលាម៉ោង ៦ល្ងាច ថ្ងៃទី៨ ខែមិថុនា ឆ្នាំ២០១៧ ជនរងគ្រោះបានទុកម៉ូតូអូសរម៉ក ម៉ាក wave ពណ៌ក្រហម គ្មានស្លាកលេខ នៅមុខបន្ទប់ជួល រហូតដល់វេលាម៉ោង១២ យប់រំលងអាធ្រាត្រឈានចូលថ្ងៃទី៩ ខែមិថុនា ជនរងគ្រោះបានងើបពីដេកមកមើលម៉ូតូ ស្រាប់តែមិនបានឃើញម៉ូតូដែលចតទុកនៅមុខបន្ទប់ឡើយ ភ្លាមៗនោះ ជនរងគ្រោះបានស្រែកផ្អើលឆោឡោដល់អ្នកជិតខាង។

លុះដល់វេលាម៉ោង ១២និង៤៥នាទីថ្ងៃត្រង់ ថ្ងៃដដែរ ជនរងគ្រោះបានជិះម៉ូតូតាមផ្លូវបេតុង ក៏បានប្រទះឃើញម៉ូតូរបស់ខ្លួនដែលត្រូវចោរកាច់កម៉ូតូនៅចំណុចភូមិចុងខ្សាច់ សង្កាត់ទួលសង្កែ ហើយក៏បានស្រែកឆោឡោចោរៗលួចម៉ូតូ ភ្លាមៗនោះ ត្រូវបានបងប្អូនប្រជាពលរដ្ឋចេញមកជួយចាប់ ស្របពេលនោះ កម្លាំងល្បាតរបស់ប៉ុស្តិ៍មកដល់ ក៏បានអន្តរាគមន៍ដេញតាមឃាត់ខ្លួនតែម្តង។

ក្រោយពីឃាត់ខ្លួនជនសង្ស័យខាងលើបានរួចមក សមត្ថកិច្ចបាននាំខ្លួនជនសង្ស័យខាងលើយកទៅសាកសួរនៅប៉ុស្តិ៍នគរបាលរដ្ឋបាលទួលសង្កែ។

ក្រោយមក សមត្ថកិច្ចបានធ្វើការប្រគល់ម៉ូតូឲ្យទៅជនរងគ្រោះវិញ។ ចំណែកឯជនសង្ស័យ ត្រូវបានសមត្ថកិច្ចបញ្ជូនខ្លួនទៅឃុំជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការរបន្តតាមនីតិវិធីច្បាប់៕