បន្ទាយមានជ័យៈ កាលពីរសៀលថ្ងៃទី១១ ខែមិថុនា ឆ្នាំ២០១៧កន្លងទៅនេះ កម្លាំងនគរបាលក្រុងប៉ោយប៉ែត បានធ្វើការឡោមព័ទ្ធផ្ទះមួយកន្លែងដែលស្ថិតនៅខាងលិចផ្សារហ៊ុយ ឡេង ក្នុងភូមិ មិត្តភាព សង្កាត់និងក្រុងប៉ោយប៉ែត ខេត្តបន្ទាយមានជ័យហើយ។

ក្នុងប្រតិបត្តិការនេះសមត្ថកិច្ចធ្វើការឃាត់ខ្លួនជនសង្ស័យប្រុសស្រីជាមុខសញ្ញាចែកចាយថ្នាំញៀនចំនួន៣នាក់ ដើម្បីបញ្ជូនទៅកាន់សាលាដំបូងខេត្តដើម្បីចាត់ការតាមនីតិវិធីច្បាប់។

លោក ធិន ស៊ិនដេត អធិការនគរបាលក្រុងប៉ោយប៉ែតបានឲ្យដឹងថា មុខសញ្ញាជនចែកចាយថ្នាំញៀនទាំង៣នាក់ខាងលើ ទី១មានឈ្មោះ ប៉ូច លីហួរ អាយុ១៥ឆ្នាំ
ភេទប្រុស នៅភូមិមិត្តភាព សង្កាត់ប៉ោយប៉ែត (ជាម្ចាស់ផ្ទះ) ,ទី២-ឈ្មោះ ស្នា ម៉ាត់ អាយុ១៧ឆ្នាំ ភេទប្រុស នៅមណ្ឌល៩ ភូមិប្រជាធម្មកើត សង្កាត់ផ្សារកណ្តាល និងជនសង្ស័យទី៣ ឈ្មោះ សួម សុវណ្ណនី អាយុ២១ឆ្នាំ ភេទស្រី នៅភូមិតាលាស់ ស្រុកមោងឫស្សី ខេត្តបាត់ដំបង។

ក្រោយឃាត់ខ្លួនជនសង្ស័យទាំង៣នាក់សមត្ថកិច្ចឆែកឆេររកឃើញនិងដកហូតវត្ថុតាងម្សៅក្រាមពណ៌សចំនួន១ថង់តូច ,កាំបិត១,ដាវ១ និងដបសម្រាប់ជក់ថ្នាំញៀនចំនួន១ផងដែរ៕