មណ្ឌលគិរីៈ លោកប្រធានការិយាល័យចរាចរណ៍នៃស្នងការនគរបាលខេត្តមណ្ឌលគិរី បានប្រាប់Post News ថា មានករណីគ្រោះថ្នាក់ចរាចរណ៍រវាងរថយន្តសាំយ៉ុង ពណ៌ស មិនចាំស្លាកលេខ និងម៉ូតូ ម៉ាកវេវ ពណ៌ខ្មៅ គ្មានស្លាកលេខ បណ្តាលឲ្យអ្នកជិះម៉ូតូស្លាប់នៅនឹងកន្លែង។

ហេតុការណ៍នេះកើតឡើងនៅម៉ោង១២និង១០នាទី ថ្ងៃត្រង់ទី១២ ខែមិថុនា ឆ្នាំ២០១៧ ស្ថិតនៅក្នុងភូមិ ឡាប៉ាខេ ឃុំស្រែខ្ទុម ស្រុកកែវសីមា ខេត្តមណ្ឌលគិរី។

លោកប្រធានការិយាល័យចរាចរណ៍បានឲ្យដឹងថា ជនរងគ្រោះមានឈ្មោះ រុំ ភារិន ភេទប្រុស អាយុ៣២ឆ្នាំ មុខរបរ ជាងសំណង់ មានស្រុកកំណើតភូមិរកាទ្វា ឃុំព្រែកពោធិ៍ ស្រុកស្រីសន្ធរ ខេត្តកំពង់ចាម។ ចំណែករថយន្តបើករត់គេចខ្លួនបាត់។

ក្រោយពីកើតហេតុ សមត្ថកិច្ចបានចុះទៅដល់កន្លែងកើតហេតុ និងនាំយកម៉ូតូមករក្សាទុករង់ចាំសាច់ញាតិមកទទួល។ ចំណែកសាកសព បានប្រគល់ឲ្យក្រុមគ្រួសារទៅយកធ្វើបុណ្យតាមប្រពៃណី៕