ភ្នំពេញ: ជនសង្ស័យ២នាក់ ត្រូវបានសមត្ថកិច្ចឃាត់ខ្លួន ក្រោយពីធ្វើសកម្មភាព លួចប្រាក់ចំនួន ៤០០ដុល្លារ និងទូរសព្ទ Iphone5s មួយគ្រឿង។ការចាប់ឃាត់ខ្លួននេះបានធ្វើឡើងកាលពីវេលាម៉ោង ១១និង ១៥នាទីយប់ ថ្ងៃទី១៤ ខែមិថុនា ឆ្នាំ២០១៧ នៅចំណុចផ្សារបឹងបៃតង ភូមិច្រេស សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ជនសង្ស័យទាំង២នាក់ ទី១ឈ្មោះ មោង ផៃ ភេទស្រី អាយុ៤៥ឆ្នាំ និងទី ២ឈ្មោះ ម.ស. ភេទប្រុស អាយុ១០ឆ្នាំ(ត្រូវជាកូន)។ ចំណែកជនរងគ្រោះឈ្មោះ គៀ សុវណ្ណធារី ភេទស្រី អាយុ២៩ឆ្នាំ។

មុនឈានដល់ការចាប់ឃាត់ខ្លួនជនសង្ស័យខាងលើ កម្លាំងល្បាតអាវុធហត្ថខណ្ឌសែនសុខ ជិះល្បាតក្នុងភូមិសាស្ត្រ ក៏ប្រទះឃើញជនសង្ស័យធ្វើសកម្មភាពលួចលុយជនរងគ្រោះ ហើយត្រូវបានកម្លាំងអាវុធហត្ថខណ្ឌសែនសុខ ឃាត់ខ្លួនបាននាំមកសាកសួរតែម្តង។

បច្ចុប្បន្ន ជនសង្ស័យខាងលើ ត្រូវបានសមត្ថកិច្ចជំនាញនៃការិយាល័យ បង្ក្រាបបទល្មើសព្រហ្មទណ្ឌ អាវុធហត្ថរាជធានីភ្នំពេញ កំពុងសួរចម្លើយ និងកសាងសំណុំរឿងបញ្ជូនទៅតុលាការ ដើម្បីផ្តន្ទាទោសតាមនិតិវិធីច្បាប់៕