កណ្តាល: ដោយត្រួតពិនិត្យឃើញថា រណ្តៅដីលោក កែវ ប៊ុនធឿន បានជីករំលោភអាជ្ញាប័ណ្ណ រហូតជិត១ហិកតា និងមិនគោរពតាមសាចរាណ៍ណែនាំរបស់ក្រសួង និងជីកខុសលក្ខណ:បច្ចេកទេស អាចប៉ះពាល់ដល់ដីប្រជាពលរដ្ឋជិតខាងនោះ ទើបលោក ហេង ចាន់ធួន អនុរដ្ឋលេខាធិការក្រសួងរ៉ែ និងថាមពលដឹកនាំមន្ត្រីជំនាញរបស់ក្រសួង និងមានការចូលរួមពីមន្ត្រីនៃមន្ទីររ៉ែនិងថាមពលខេត្តកណ្តាលចុះទៅបិទជាបណ្តោះអាសន្នចំនួនមួយសប្តាហ៍ដើម្បីឲ្យម្ចាស់អាជ្ញាប័ណ្ណកែតម្រូវលក្ខណ:បច្ចេកទេស និងរត់អាជ្ញាប័ណ្ណឲ្យរួចរាល់ ទើបអនុញ្ញាតិឲ្យធ្វើអាជីវកម្មបន្តទៀត។

ការចុះទៅបិទនេះ ធ្វើឡើងកាលពីព្រឹកថ្ងៃទី១៥ខែមិថុនា ឆ្នាំ២០១៧ ស្ថិតនៅក្នុងភូមិឆ្មាពួន ឃុំជើងកើប ស្រុកកណ្តាល ស្ទឹង ខេត្តកណ្តាល។

លោក ហេង ចាន់ធួន បានប្រាប់អ្នកយកព័ត៌មានថា ការផ្អាករណ្តៅរបស់លោក កែវ ប៊ុនធឿន មួយសប្តាហ៍នេះ ដោយសារម្ចាស់រណ្តៅដីនេះមិនគោរពតាមសារាចរណ៍ណែនាំលេខ៣១០ស្តីពីច្បាប់ដឹកជញ្ជូនសារធាតុរ៉ែនិងជីកខុសលក្ខណ:បច្ចេកទេសដែលអាចបង្កឲ្យប៉ះពាល់ដល់ដីប្រជាពលរដ្ឋជិតខាង ជាពិសេសនោះគឺជីករំលោភទៅលើអាជ្ញាប័ណ្ណរបស់ខ្លួនរហូតដល់ទៅ៨០០០ម៉ែត្រការ៉េ ដោយទំហំដីនៅក្នុងអាជ្ញាប័ណ្ណដែលក្រសួងចេញឲ្យជីកធ្វើអាជីវកម្មមានត្រឹមតែ១០០០០ម៉ែត្រការ៉េប៉ុណ្ណោះ ដូច្នេះយើងត្រឹមតែបិទដើម្បីឲ្យម្ចាស់អាជ្ញាប័ណ្ណនេះ ធ្វើអាជ្ញាប័ណ្ណត្រឹមត្រូវទៅតាមទំហំកំពុងជីកនិងកែតម្រូវលក្ខណ:បច្ចេកទេសត្រឹមត្រូវផងដែរ ទើបក្រសួងអនុញ្ញាតិរណ្តៅនេះបើកធ្វើអាជីវកម្មរបស់ខ្លួនបន្តទៀតបាន ប៉ុន្តែនៅពេលម្ចាស់បានអាជ្ញាប័ណ្ណហើយក្រសួងនិងចុះមកពិនិត្យម្តងទៀត បើមិនត្រឹមត្រូវតាមការណែនាំនោះ ក៏មិនអនុញ្ញាតិឲ្យធ្វើអាជីវកម្មដែរ លុះត្រាតែកែតម្រូវឲ្យស្របតាមលក្ខណ:បច្ចេកទេសទាំងអស់។

លោក ចម្រើន នៅក្នុងភូមិឆ្នាពួន ឃុំជើងកើប ស្រុកកណ្តាលស្ទឹង ខេត្តកណ្តាល ដែលមានផ្ទះរស់នៅលើខ្នងព្រែកកំពឹសស្របតាមបណ្តោយផ្លូវរថយន្តដឹកដីចេញនោះ បាននិយាយថាពួកគាត់សព្វថ្ងៃមានការលំបាកខ្លាំងណាស់ ដោយសាររថយន្តដឹកដីធំៗបើកលឿនបង្កឲ្យមានការភ័យខ្លាចពីសុវត្ថិភាពក្រុមគ្រួសារពួកគាត់ជាពិសេសនោះគឺកូនតូចៗរបស់ពួកគាត់ប្រឈមនឹងគ្រោះថ្នាក់ដោយសាររថយន្តដឹកដីនេះ ចំពោះបរិស្ថានរស់នៅគឺរឹតតែពិបាកខ្លាំងទៀត ដោយពេលថ្ងៃត្រង់ពេលរថយន្តបើកមកម្តងៗហុយងងិតគ្រប់លើផ្ទះសម្បែងពួកគាត់ចូលចានបាយចានសម្លរ លុះពេលព្រឹកល្ងាចរអិលធ្វើដំណើរមិនរួច ចំណែកផ្លូវ ខូចខាតជង្ហុកធំដូចរន្ធបាយខុមនិងកន្លែងខ្លះបើកម៉ូតូរ៉ឺម៉កលែងរួចហើយ ខ្នងទំនប់ខូចកៀរលុបនាយលុបអាយបណ្តាលឲ្យខ្នងទំនប់ទាបទៅៗ ឆ្នាំនេះអាចប្រឈមនឹងទឹកលិចជាមិនខាន ដូច្នេះគាត់សំណូមពរក្រុមហ៊ុនជួសជុលផ្លូវនិងចាក់លុបបំពេញផងដែរ បើចេះតែឈូសឆាយខ្នងទំនុបបែបនេះនៅរដូវ ទឹកឡើងនិងហៀរចូលផ្ទះសម្បែងប្រជាពលរដ្ឋជាមិនខាន។

មន្ត្រីនៅសាលាខេត្តបានបង្ហើបថា ម្ចាស់អាជ្ញាប័ណ្ណ កែវ ប៊ុនធឿន អាចមិនខុសពីម្ចាស់ អាជ្ញាប័ណ្ណឈ្មោះថា លោក សៅ ពន្លក នោះទេ ដោយសារលោក អ៊ុក ឡាឌីន ក្រសួងមិនចេញអាជ្ញាប័ណ្ណឲ្យទៀតព្រោះបង្កឲ្យប៉ះពាល់ដល់ប្រជាពលរដ្ឋជាបន្តបន្ទាប់ ទើបយកឈ្មោះអ្នកផ្សេងមកឈរលើ អាជ្ញាប័ណ្ណបែបនេះ ហើយការជីករំលោភអាជ្ញាប័ណ្ណបែបនេះធ្វើបាត់ឲ្យចំណូលសួយសារអាករដែលត្រូវបង់ចូលរដ្ឋក្នុង១ឆ្នាំមិនតិច ដូច្នេះក្រសួងគួរតែពិន័យទៅលើឈ្មួញដែលប្រព្រឹត្តិបែបនេះឲ្យចាស់ដៃបន្តិចដើម្បីឲ្យរាងចាល និងជាគំរូទៅអ្នកដទៃទៀតផងដែរ។

លោក អ៊ុក ឡាឌីន អ្នកយកព័ត៌មានយើង បានទូរសព្ទទៅ កាន់ដើម្បីសុំការបំភ្លឺតែគ្មានអ្នកលើករីឯលោក កែវ ប៊ុនធឿន វិញ មិនមានប្រភពដើម្បីទំនាក់ទំនងការបំភ្លឺបានទេ៕