ភ្នំពេញៈ ជនសង្ស័យម្នាក់ ត្រូវបានកម្លាំងសមត្ថកិច្ចប៉ុស្តិ៍ឫស្សីកែវ និងប្រជាការពារសង្កាត់ ធ្វើការឃាត់ខ្លួន កាលពីវេលាម៉ោង៤៖៣០នាទី ទៀបភ្លឺថ្ងៃទី២២ ខែឧសភា ឆ្នាំ២០១៦ នៅក្នុងសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។

លោក តូច គឹមសុង នាយប៉ុស្តិ៍នគរបាលឫស្សីកែវ បានប្រាប់ឲ្យដឹងថា នៅយប់ថ្ងៃទី២២ ខែឧសភា ឆ្នាំ២០១៦ កម្លាំងសមត្ថកិច្ចបាន និងកំពុងជិះល្បាតជុំវិញមូលដ្ឋាន ពេលនោះក៏បានប្រទះឃើញជនសង្ស័យ២នាក់ ហើយកម្លាំងសមត្ថកិច្ចមានការសង្ស័យ ក៏បានហៅឲ្យឈប់ ប៉ុន្តែជនសង្ស័យម្នាក់ទៀត បានរត់គេចខ្លួនបាត់ ដោយម្នាក់ទៀត ត្រូវបានកម្លាំងសមត្ថកិច្ចប៉ុស្តិ៍ និងប្រជាការពារឃាត់ខ្លួន ហើយធ្វើការឆែកឆេររកឃើញថ្នាំញៀនប្រភេទម្សៅក្រាម ពណ៌សថ្លា១កញ្ចប់ធំ ព្រមទាំងថ្នាំគ្រាប់ប្រភេទគ្រវី១គ្រាប់ សោសម្រាប់កាច់កម៉ូតូ២ និងដែកទួណឺវិសចំនួន២ផងដែរ។

ជនសង្ស័យដែលសមត្ថកិច្ចឃាត់ខ្លួននោះ ឈ្មោះ ចាន់ ឡុង ហៅ ឡុង ភេទប្រុស អាយុ១៨ឆ្នាំ ជនជាតិវៀតណាម មុខរបរកម្មករសំណង់ ស្នាក់នៅផ្ទះជួល ភូមិសាមគ្គី សង្កាត់ឫស្សីកែវ ខណ្ឌឫស្សីកែវ ដោយជនសង្ស័យម្នាក់ទៀត បានរត់គេចខ្លួនបាត់ ។

បច្ចុប្បន្នជនសង្ស័យខាងលើ ត្រូវបានកម្លាំងសមត្ថកិច្ចប៉ុស្តិ៍ឫស្សីកែវ បញ្ជូនទៅឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងបញ្ជូនទៅកាន់តុលាការ ចាត់ការបន្តតាមផ្លូវច្បាប់៕