ភ្នំពេញៈ រម៉កដឹកធុងហ្គាសបើកបុកកន្លែងលក់សាំង និងប៉ះកង់ម៉ូតូ បង្កជាអគ្គិភ័យឆាបឆេះ បណ្តាលឲ្យមនុស្សប្រុសស្រីរងរបួសធ្ងន់ស្រាល៧នាក់។ ហេតុការណ៍នេះបានកើតឡើងកាលពីវេលាម៉ោង៩ និង៣០នាទីព្រឹក ថ្ងៃទី១៦ ខែមិថុនា ឆ្នាំ២០១៧ ស្ថិតនៅតាមផ្លូវបេតុង ភូមិក្រាំងអង្ក្រង សង្កាត់ក្រាំងធ្នង់ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីប្រជាពលរដ្ឋបានឲ្យដឹងថា មុនពេលកើតហេតុ រម៉កដឹកធុងហ្គាសបានបើកពីកើតទៅលិច លុះមកដល់កន្លែងកើតហេតុ មានរថយន្តមួយគ្រឿងបើកស្របទិសគ្នា បានប៉ះគូថរម៉កបណ្តាលឲ្យរម៉ករេចង្កូចទៅបុកដបសាំងដែលតាំងលក់នៅកន្លែងលក់សាំងនិងប៉ះកង់ម៉ូតូ កំពប់សាំងឆាបឆេះធុងហ្គាសបណ្តាលឲ្យមនុស្សប្រុសស្រីរបួសធ្ងន់ស្រាល៧នាក់តែម្តង។

ប្រភពពីសមត្ថកិច្ចចរាចរណ៍ម្នាក់បានឲ្យដឹងថា នេះជាករណីគ្រោះថ្នាក់ចរាចរណ៍ដោយរម៉កខាងលើបានបើកពីកើតទៅលិច តាមផ្លូវបេតុងមិនដឹងយ៉ាងម៉េចក៏រេចង្កូតទៅបុកកន្លែងលក់សាំបណ្តាលឲ្យឆាបឆេះតែម្តង។

សមត្ថកិច្ចឲ្យដឹងជាបឋមថាជនរងគ្រោះប្រុសស្រីទាំង៧នាក់ ទី១មានឈ្មោះ គីម ស្រួយ ភេទស្រី អាយុ៤៧ឆ្នាំ ,ទី២ឈ្មោះ គីម ស្រៀង ភេទប្រុស អាយុ៤៤ឆ្នាំ ,ទី៣ឈ្មោះ សៀម សុខ ភេទស្រី អាយុ១៤ឆ្នាំ ,ទី៤ឈ្មោះ សៀម សា ភេទប្រុសអាយុ៤ឆ្នាំ ,ទី៥ឈ្មោះ សៀម សាន ភេទស្រី អាយុ៤ឆ្នាំ អ្នកទាំងអស់គ្នាស្នាក់នៅភូមិក្រាំងអង្ក្រង២ សង្កាត់ក្រាំងធ្នង់ ខណ្ឌសែនសុខ និងបុរស២នាក់ទៀត ជាអ្នកជិះរម៉កដឹកធុងហ្គាសមិនត្រូវបានស្គាល់ឈ្មោះនៅឡើយទេ។

ក្នុងនោះអគ្គិភ័យបានឆាបឆេះ ម៉ូតូ៣គ្រឿង ម៉ាស៊ីនម៉ាស៊ូត១គ្រឿង កន្ទុយរម៉ក១សាំងនិងម៉ាស៊ូតជាច្រើនលីត្រ ធុងហ្គាសចំនួន១០ធុង និងសម្ភារៈមួយចំនួនទៀតរងការខូចខាតផងដែរ។ ភ្លាមៗនោះក៏មានរថយន្តពន្លត់អគ្គិភ័យរបស់ស្នងការដ្ឋានរាជធានីភ្នំពេញ ចំនួន៦គ្រឿង ដោយប្រើប្រាស់ទឹកអស់ចំនួន៥គ្រឿងទើបរលត់ទៅវិញ។ ចំណែកជនរងគ្រោះត្រូវបានរថយន្តសង្គ្រោះដឹកទៅសង្គ្រោះភ្លាមៗផងដែរ៕

https://youtu.be/9-5qA39sSKk