(ភ្នំពេញ): លោក សាន្ត ប៊ុនធឿន ដែលគេស្គាល់ថាជាអ្នកកាសែតជើងខ្លាំងរិះគន់មិនសំចៃមាត់តាមហ្វេសប៊ុក ត្រូវបានលោក ឆែ វីរៈ ចៅក្រមសាលាដំបូងរាជធានីភ្នំពេញ សម្រេចនៅព្រឹកថ្ងៃទី២៥ ខែមីនា ផ្តន្ទាទោស៤ខែតែទោសនេះត្រូវព្យួរនិងពិន័យ៨០មុឺនរៀល តាមមាត្រា៧៧ ច្បាប់ស្តីពីចរាចរណ៍ផ្លូវគោក ពាក់ព័ន្ធការបើកម៉ូតូលើសកម្រិតជាតិអាកុល ។
លោក សាន្ត ប៊ុនធឿន ត្រូវបាននគរបាលចរាចរណ៍ ឃាត់ខ្លួនកាលពីយប់ថ្ងៃទី៩ ខែមីនា នៅចំណុចគោលដៅកំបូល ផ្លូវជាតិលេខ៤ សង្កាត់កំបូល ខណ្ឌពោធិ៍សែនជ័យ ។
នគរបាល បញ្ជាក់ថា លោក សាន ប៊ុនធឿន បានជិះម៉ូតូម៉ាកហុងដាឌ្រីមសង់សេ១២៥ គ្មានស្លាកលេខ មានកម្រិតជាតិអាកុល 0,64Mg/l ល្មើសនឹងច្បាប់ចរាចរណ៍ផ្លូវគោក ត្រង់ជំពូកទី១០ ទោសបញ្ញត្តិមាត្រា៧៧ ។ នគរបាលបញ្ជាក់ទៀតថា នៅពេលឃាត់ខ្លួន លោក សាន ប៊ុនធឿន បានបង្កភាពបាត់បង់សណ្តាប់ធ្នាប់ដោយស្រែកឡូឡា ប្រមាថដល់ ថ្នាក់ដឹកនាំកំពូលៗ ពោលគឺប្រើចរិតច្រង៉េងច្រង៉ាង អសីលធម៌ ៕
មតិយោបល់