កណ្តាល: ករណីឃាត់ខ្លួនជនសង្ស័យចំនួន២នាក់ ពីបទលួចមានស្ថានទម្ងន់ទោស​ (ប្លន់) កាលពីថ្ងៃទី ១៥ ខែមិថុនា ឆ្នាំ២០១៧ កន្លងទៅនេះ នៅចំណុច ភូមិព្រែកសំរោង១ សង្កាត់តាខ្មៅ ក្រុងតាខ្មៅ ខេត្តកណ្តាល​ ដោយយោងតាម​ពាក្យបណ្តឹងរបស់ជនរងគ្រោះ។

ហេតុការណ៍នេះកើតឡើងនៅថ្ងៃទី១៦​ ខែមិថុនា ឆ្នាំ២០១៧ នៅចំណុច ភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល និងចំណុច ភូមិស្វាយរលំ១ ឃុំស្វាយរលំ ស្រុកស្អាង ខេត្តកណ្តាល។

សមត្ថកិច្ចបានធ្វើការឃាត់ខ្លួនជនសង្ស័យចំនួន២នាក់ ទី១ឈ្មោះ រ៉ាមី ភេទប្រុស អាយុ១៨ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅ ភូមិលេខ៣ ឃុំស្វាយប្រទៀល ស្រុកស្អាង ខេត្តកណ្តាល (ឃាត់ខ្លួន) និងទី២ឈ្មោះ ម៉េងហុង ភេទប្រុស អាយុ១៧ឆ្នាំ ជនជាតិខ្មែរ ទីលំនៅ ភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល (ឃាត់ខ្លួន)។ ក្នុងការស៊ើបអង្កេតជាក់ស្តែងលើករណីលួច ​មានស្ថានទម្ងន់ទោស​ (ប្លន់) កាលពីថ្ងៃទី ១៥ ខែមិថុនា ឆ្នាំ២០១៧​ កន្លងមក នៅចំណុច ភូមិព្រែកសំរោង១ សង្កាត់តាខ្មៅ ក្រុងតាខ្មៅ ខេត្តកណ្តាល​ ដោយយោងតាម​បណ្តឹងរបស់ជនរងគ្រោះឈ្មោះ ចរិយ៉ា ភេទប្រុស ជនជាតិខ្មែរ ទីលំនៅ ​ភូមិព្រែកសំរោង សង្កាត់តាខ្មៅ​ ក្រុងតាខ្មៅ ខេត្តកណ្តាល។

តាមប្រភពព័ត៌មានបានឱ្យដឹងថា មុនពេលកើតហេតុជនរងគ្រោះបានជិះម៉ូតូរបស់ខ្លួនម៉ាក់ស្តុបពី ពណ៌ស ស្លាកលេខកណ្តាល 1S- 4615 មកពីហូបអី ហើយក៏ជិះទៅផ្ទះ ក៏ឈប់អង្គុយលេងជាមួយមិត្តភ័ក្ក្រនៅជិតផ្ទះ ម៉ោងប្រហែល១និង៣០នាទីរំលងអាធ្រាត ឈានចូលថ្ងៃទី១៥ ខែមិថុនា ឆ្នាំ២០១៧ ខណ:នោះមានជនសង្ស័យប្រហែល ៥ ទៅ ៦ នាក់ ជិះម៉ូតូ ៣ គ្រឿង បានធ្វើសកម្មភាព ដេញកាប់ ជនរងគ្រោះរួចយកម៉ូតូជនរងគ្រោះគេចខ្លួនបាត់រហូតដល់ថ្ងៃទី១៦ ខែមិថុនា ឆ្នាំ២០១៧ បានសមត្ថកិច្ចកងរាជអាវុធហត្ថក្រុងតាខ្មៅ ស្រាវជ្រាវឃាត់ខ្លួនបានជនសង្ស័យចំនួន២នាក់ និងអធិការក្រុងតាខ្មៅឃាត់ខ្លួនបានចំនួនម្នាក់ នៅសល់បក្សពួកមួយចំនួនគេចខ្លួនបាត់។

ដោយអនុវត្តតាមអនុសាសន៍និងបទបញ្ជាដ៏ខ្ពង់ខ្ពសរបស់ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងឯកឧត្តម ម៉ៅ ភិរុណ អភិបាលខេត្ត និងដោយមានការចង្អុលបង្ហាញដឹកនាំផ្ទាល់ពីលោក មេបញ្ជាការខេត្ត សំ តុលា ព្រមទាំងមានការសម្របសម្រួលពីលោក លាវ ស្រេង ព្រះរាជអាជ្ញាអមសាលាដំបូងខេត្តកណ្តាល ​កម្លាំងកងរាជអាវុធហត្ថក្រុងតាខ្មៅ ដឹកនាំដោយលោកមេបញ្ជាការក្រុង ហៀង ចាន់ធី និងកម្លាំងជំនាញមន្ទីរស្រាវជ្រាវកងរាជអាវុធហត្ថខេត្តបានធ្វើការស្រាវជ្រាវស៊ើបអង្កេតជាក់ស្តែងនូវករណីលួចមានស្ថានទម្ងន់ទោស (ប្លន់) កាលពីថ្ងៃទី១៥ ​ខែមិថុនា ឆ្នាំ២០១៧ ហើយបានធ្វើការឃាត់ខ្លួនជនសង្ស័យចំនួន២នាក់ខាងលើដើម្បីចាត់ការទៅតាមនិតិវីធីច្បាប់៕