កំពង់ចាម: ករណីគ្រោះថ្នាក់ចរាចរណ៍មួយកើតឡើងរវាងម៉ូតូ និងគោយន្តកន្រ្តៃ បណ្តាលឲ្យបុរស២នាក់ រងរបួសធ្ងន់។
ហេតុការណ៍បានកើតឡើងកាលពីវេលាម៉ោង៩ និង៣០នាទីយប់ ថ្ងៃទី១៨ ខែមិថុនា ឆ្នាំ២០១៧ នៅចំណុចភូមិត្នោតាសាយ ឃុំព្រែកកក់ ស្រុកស្ទឹងត្រង់ ខេត្តកំពង់ចាម។

សមត្ថកិច្ចបានឲ្យដឹងថា ជនរងគ្រោះជិះម៉ូតូម៉ាកZoomer-X គ្មានស្លាកលេខ ដោយឈ្មោះ សេង ស្រ៊ាន ភេទប្រុស ស្នាក់នៅភូមិកើតហេតុខាងលើ និងអ្នករួមដំណើរឈ្មោះ រ៉ន រ៉ូត ភេទប្រុស អាយុ១៨ឆ្នាំ ស្នាក់នៅភូមិមាឃ១ បានបុកគោយន្តកន្រ្តៃ បណ្ដាលឲ្យរងគ្រោះជិះម៉ូតូទាំង២នាក់ រងរបួសធ្ងន់ ចំណែកអ្នកបើកគោយន្តកន្រ្តៃមិនស្គាល់អត្តសញ្ញាណ បានគេចខ្លួនបាត់តែម្ដង។

ក្រោយពីកើតហេតុ សមត្ថកិច្ចបានចុះទៅដល់កន្លែងកើតហេតុ ធ្វើការវាស់វែង និងនាំយកមធ្យោបាយទាំង២គ្រឿងមករក្សាទុក រង់ចាំការដោះស្រាយគ្នាពេលក្រោយ៕