ព័ត៌មានជាតិ

Update៖ព្រោះតែកើតមកជាកូនអ្នកក្រគ្មានលុយរៀនសូត្ររហូតគិតអីមិនចេញ ចងកសម្លាប់ខ្លួន

ភ្នំពេញ: យុវជនម្នាក់ ដោយសារតែជីវភាពខ្វះខាត ពុំមានលុយសម្រាប់រៀនសូត្រ រហូតកើតមានវិបត្តិផ្លូវចិត្តធ្ងន់ធ្ងរ ក៏សម្រេចចិត្តធ្វើអត្តឃាតចងកសម្លាប់ខ្លួន ក្នុងបន្ទប់ស្នាក់នៅ ស្លាប់យ៉ាងអាណោចអាធ័ម។

ហេតុការណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង៩និង២០នាទីយប់ថ្ងៃទី១៩ ខែមិថុនា ឆ្នាំ២០១៧ ស្ថិតនៅចំណុចផ្ទះជួលជាន់ទី២ ក្នុងភូមិស្លែងរលើង សង្កាត់ទឹកថ្លា ខណ្ឌសែនសុខ រាជធានីភ្នំពេញ។

សមត្ថកិច្ចបានឲ្យដឹងថា ជនរងគ្រោះដែលចងកសម្លាប់ខ្លួនខាងលើនេះមានឈ្មោះ ឈឿន សាអែម ភេទប្រុស អាយុ១៥ឆ្នាំ មុខរបរជាសិស្សរៀនថ្នាក់ទី៨ មានស្រុកកំណើតនៅ ឃុំអំពិល៥ដើម ស្រុកបវេល ខេត្តបាត់ដំបង ស្នាក់នៅបន្ទប់ជួលកើតហេតុជាមួយបងស្រី ដែលមានមុខរបរជាកម្មការិនីរោងចក្រ។

បើតាមប្រភពព័ត៌មានពីបងស្រីជនរងគ្រោះបានឲ្យដឹងថា ចំពោះមូលហេតុដែលប្អូនរបស់គាត់ចងកសម្លាប់ខ្លួន គាត់មិនបានដឹងច្បាស់នោះទេ ប្អូនរបស់គាត់គឺមានអត្តចរិតស្លូតបូត មិនដែលខិលខូច គិតតែពីខំរៀន ហើយមុនពេលកើតហេតុប៉ុន្មានថ្ងៃ រូបគាត់ជាបងបាននិយាយប្រាប់ប្អូនថា ប្អូនអើយ ផ្អាករៀនអង់គ្លេសសិនទៅ បងស្រីគ្មានលុយសម្រាប់ឲ្យប្អូនសិក្សាទេ ណាមួយមិនមានកង់សម្រាប់ជិះទៅរៀន ដោយសារតែបាត់កង់ចំនួន២ដងហើយ។ ប្អូនរបស់គាត់ក៏បានប្រាប់បងស្រីថា គាត់ដើរទៅរៀនគឺមានការពិបាកណាស់ តែមិនដឹងធ្វើយ៉ាងណាព្រោះតែជីវភាពមានការលំបាក ស្រាប់តែពេលចេញពីធ្វើការគាត់បានត្រឡប់មកបន្ទប់ស្នាក់នៅវិញក៏ឃើញប្អូនប្រុសរបស់គាត់ចងកសម្លាប់ខ្លួននៅក្នុងបន្ទប់តែម្ដង។

អ្វីដែលសំខាន់នោះ ក្រោយពេលដែលស្លាប់ គេបានឃើញបណ្តាំមួយច្បាប់ ដែលជនរងគ្រោះបានសរសេរទុកជូនបងស្រីដោយខ្លឹមសារមានដូចតទៅ ៖
វេលាម៉ោង៩និង០០នាទី លាហើយបងស្រី ខ្ញុំស្រលាញ់បងស្រីណាស់ ខ្ញុំខុសហើយសុំទោសផង បើមានជាតិក្រោយពិតខ្ញុំសុំធ្វើជាប្អូនរបស់បងទៀតផង ហើយសូមឲ្យជាតិក្រោយបងប្អូនយើងបានជួបជុំគ្នារហូតកុំឲ្យដូចជាតិនេះ រូបខ្ញុំពិបាកណាស់កើតមកជាកូនអ្នកក្រ គ្មានអ្នកយល់ចិត្ត។

នេះគឺជាបណ្ដាំចុងក្រោយដែលជនរងគ្រោះបានសរសរផ្ទាល់ដៃទុកជូនបងស្រី ពិតជាកម្សត់ខ្លាំងណាស់ដោយសារតែជីវភាពខ្វះខាត រហូតមានវិបត្តិផ្លូវចិត្តធ្ងន់ធ្ងរក៏សម្រេចចិត្តធ្វើអត្តឃាតបែបនេះ ៕

មតិយោបល់