សៀមរាបៈ លោកអធិការស្រុកវ៉ារិន បានប្រាប់ Post News ថា មានករណីអគ្គិភ័យឆេះតូបជួសជុលម៉ូតូអស់ទាំងស្រុង។
ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង៨ ព្រឹកថ្ងែទី ២១ ខែមិថុនា ឆ្នាំ២០១៧ នៅចំណុចជិតផ្លូវបំបែកទៅគោកដូងស្ថិតក្នុងភូមិឫស្សីធំ ឃុំស្វាយស ស្រុកវ៉ារិន ខេត្តសៀមរាប។

សូមបញ្ជាក់ចំពោះករណីខាងលើ ដោយសារឈ្មោះ ណុក ភេទប្រុស ត្រូវជាកូនប្រសា របស់ឈ្មោះ ឡឹក ឆុល ស្នាក់នៅភូមិឃុំកើតហេតុខាងលើ យកគោយន្តកន្ត្រៃមកជួសជុល ប៉ុន្តែមិនឲ្យជាងធ្វើឲ្យទេ ធ្វើខ្លួនឯង ឆាបដែកគោយន្តកន្ត្រៃ ស្របពេលដែលក្រុមគ្រួសារជនរងគ្រោះកំពុងតែវាល់សាំងច្រកដបសម្រាប់លក់ បណ្តាលឲ្យឆាបឆេះតែម្តង។
មា្ចស់តូប មានឈ្មោះ ណាន លយ ភេទប្រុស អាយុ២៧ ឆ្នាំ មានប្រពន្ធឈ្មោះ ហើយ ហួង អាយុ២៥ឆ្នាំ ស្នាក់នៅកន្លែងកើតហេតុខាងលើ។

ចំពោះករណីនេះ ម្ចាស់តូបជួសជុលម៉ូតូកំពុងដាក់ពាក្យបណ្ដឹងលើជនបង្កអគ្គិភ័យ ហើយលោកអធិការបានរាយការណ៍ជូនស្នងការ រងទទួលផែនព្រហ្មទណ្ឌដើម្បីស៊ើបអង្កេតនិងចំណាត់ការករណីនេះដែរ។

ក្រោយពីធ្វើការស្រាវជ្រាវថា មានបទល្មើសក្នុងការបង្កអគ្គិភ័យ កើតឡើងដោយអចេតនា និងខូចខាតធ្ងន់ធ្ងរ ឃាត់ខ្លួនជនល្មើស ដើម្បីកសាងសំណុំរឿងបញ្ជូនទៅតុលាការ ចាត់ការតាមនីតិវិធីច្បាប់៕