ខេត្តប៉ៃលិន: សិស្សចំនួន២ក្រុមបានឈ្លោះប្រកែកគ្នា រហូតដល់ប្រើអំពើហិង្សាវាយតប់គ្នាទៅវិញទៅមក បណ្តាលឱ្យរងរបួសស្រាល ខណ:សិស្សដទៃទៀតកំពុងតែនាំគ្នារៀនសូត្រនៅក្នុងថ្នាក់។  ការឈ្លោះគ្នានេះ បណ្តាលឱ្យមានការភ្ញាក់ផ្អើលដល់គ្រូនិងសិស្សពេញសាលាតែម្តង។ ពេលនោះដោយមានកិច្ចសហការរវាងលោកគ្រូអ្នកគ្រូ ទើបរាយការណ៍ជូននគរបាលប៉ុស្តិ៍ ឱ្យហៅសិស្សទាំង២ក្រុមយកទៅធ្វើការអប់រំណែនាំឱ្យឈប់បង្កភាពអនាធិបតេយ្យបែបនេះតទៅទៀតនៅក្នុងសាលារៀន។

ហេតុការណ៍នេះកើតឡើងនៅវេលាម៉ោង៨និង៤៥នាទីព្រឹក កាលថ្ងៃទី២១ ខែមិថុនា ឆ្នាំ២០១៧ នៅចំណុចក្នុងបរិវេណវិទ្យាល័យហ៊ុន សែនក្រុងទេពនិម្មិត ស្ថិតនៅ ភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន។

ប្រភពព័ត៌មានពីលោក សឿ ឡងឌី នាយប៉ុស្តិ៍នគរបាលសង្កាត់ទួលល្វា បានឱ្យដឹងថា ដោយមានកិច្ចសហការពីគ្រូវិទ្យាល័យហ៊ុនសែនក្រុងទេពនិម្មិត ទើបខាងលោកធ្វើការនាំខ្លួនសិស្សចំនួន៣នាក់ ដើម្បីហៅទៅសាកសួរ ទី១ ឈ្មោះ ហេង កម្សត់ ភេទប្រុស អាយុ១៦ឆ្នាំ រស់នៅ ភូមិសួនអំពៅលិច សង្កាត់ប៉ៃលិន ក្រុងប៉ៃលិន ជាជនដៃដល់ ទី២ ឈ្មោះ សួន យី ភេទប្រុស អាយុ១៧ឆ្នាំ រស់នៅ ភូមិអូរតាពុកលើ សង្កាត់ប៉ៃលិន ក្រុងប៉ៃលិន ជាសាក្សីឃើញហេតុការណ៍ ទី៣ ឈ្មោះ អឿ ប៊ុនឡេង ភេទប្រុស អាយុ១៧ឆ្នាំ រស់នៅ ភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន ជាសាក្សីឃើញហេតុការណ៍។ ចំណែកឯសិស្សរងគ្រោះម្នាក់ ឈ្មោះ វ៉ាន់ ពិសិដ្ឋ ភេទប្រុស អាយុ១៦ឆ្នាំ រងរបួសហើមបបូរមាត់ខាងស្តាំស្រាល រស់នៅ ភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន។

បើតាមលោក ហាំ យ៉ារិន ជាអ្នកគ្រប់គ្រងវិទ្យាល័យហ៊ុនសែនក្រុងទេពនិម្មិត បានឱ្យដឹងថា កាលពីព្រឹកមិញពិតជាមានករណីសិស្សសាលាវាយតប់គ្នាក្នុងវិទ្យាល័យមែន ហើយខាងលោកបានទាក់ទងទៅនគរបាលប៉ុស្តិ៍ឱ្យហៅសិស្សដែលពាក់ព័ន្ធទាំង២ក្រុមទៅសួរនាំ ដើម្បីធ្វើការអប់រំរួចរាល់អស់ហើយ។ លោកបន្តទៀតថា ករណីនេះលោកមិនទាន់ដឹងថា មកពីមូលហេតុអ្វី ដែលនាំឱ្យពួកគេវាយតប់គ្នាក្នុងសាលាបែបនេះនៅឡើយទេ ប្រហែលជានៅថ្ងៃស្អែក ខាងលោកនឹងហៅសិស្សបង្កហេតុនិងសិស្សរងគ្រោះទៅសួរនាំ រកមូលហេតុ រួចធ្វើការអប់រំឱ្យឈប់ប្រព្រឹត្តអំពើវាយតប់គ្នាបែបនេះទៀត។

បើតាមប្រភពពីសិស្សសាលាមួយចំនួនបានប្រាប់ឱ្យដឹងថា នៅក្នុងវិទ្យាល័យមួយនេះ គេឧស្សាហ៍ឃើញមានសិស្សប្រុសស្រីឈ្លោះទាស់ទែងគ្នា និងវាយតប់គ្នាជាញឹកញាប់ ហើយក៏ត្រូវនគរបាលយកទៅអប់រំជាញឹកញយផងដែរ។ ប៉ុន្តែហាក់ដូចជាអត់មានការរាងចាលអ្វីនោះឡើយ ខណ:សាលារៀនជាថ្នាលដ៏ល្អ សម្រាប់សិក្សាអប់រំ គួរតែមានចរិតស្លូតបូត សុភាពរាបសារ ជាគំរូដល់អ្នកដទៃ ជាទំពាំងស្នងឫស្សី ហើយខំប្រឹងប្រែងរៀនសូត្រ ដើម្បីអនាគតខ្លួនឯង និងក្រុមគ្រួសារ នោះទើបល្អប្រសើរជាង។ តែបើនាំគ្នាប្រព្រឹត្តអំពើបែបនេះ នាំឱ្យអាប់អោនដល់ឪពុកម្តាយ ដល់សាលារៀន ដែលជាកន្លែងអប់រំឱ្យមនុស្សល្ងិតល្ងង់ក្លាយទៅជាមនុស្សល្អ។

ពាក់ព័ន្ធនឹងករណីនេះ ដោយមានការយល់ព្រមពីម្តាយឪពុកទាំងសងខាងសុំធ្វើកិច្ចសន្យារាងចាលបញ្ចប់ និងធានាសុំកូនរបស់ខ្លួនយកទៅធ្វើការអប់រំវិញ ដើម្បីបញ្ចប់រឿងរ៉ាវផងដែរ៕