ភ្នំពេញៈ កម្មករសំណង់ម្នាក់ បានធ្វើអត្តឃាតចងកសម្លាប់ខ្លួនឯង ដោយមិនមានអ្នកណាម្នាក់ដឹងពីមូលហេតុនៅក្នុងរោងស្នាក់នៅរបស់កម្មករនៅកោះពេជ្រ ត្រូវបានកម្មករធ្វើការជាមួយគ្នាបានប្រទះឃើញនិងបញ្ជូនទៅធ្វើការសង្គ្រោះដែរតែជនរងគ្រោះបានដាច់ខ្យល់ស្លាប់បាត់ទៅហើយ។

ហេតុការណ៍នេះបានកើតឡើងកាលពីវេលាម៉ោង១១និង៣០នាទីព្រឹក ថ្ងៃទី២២ ខែមិថុនា ឆ្នាំ២០១៧ ស្ថិតនៅចំណុចក្នុងរោងស្នាក់នៅកម្មករកោះពេជ្រ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

យោងតាមប្រភពព័ត៌មានពីសមត្ថកិច្ចម្នាក់បានឲ្យដឹងថា ជនរងគ្រោះមានឈ្មោះ ខៃ ប្រុញ អាយុ២៤ឆ្នាំ មុខរបរកម្មករសំណង់ ស្នាក់នៅកន្លែងកើតហេតុខាងលើ មានស្រុកកំណើតនៅភូមិរស្មីសង្ហា ឃុំរស្មីសង្ហា ស្រុករតនៈមណ្ឌល ខេត្តបាត់ដំបង។

បើតាមប្រភពព័ត៌មានបានឲ្យដឹងថា មុនពេលកើតហេតុ មានកម្មកសំណង់ធ្វើការជាមួយគ្នាម្នាក់បានចេញពីធ្វើការមកកាន់បន្ទប់ស្នាក់នៅខាងលើ ដោយបានរុញទ្វារក្នុងបំណងបើកទ្វារចូលទៅខាងក្នុងមិនកើតព្រោះដាក់គន្លឹះខាងក្នុងជាប់ ពេលនោះបុរសជាកម្មករម្នាក់នោះបានអើតមើលតាមចន្លោះជញ្ជាំងក៏ស្រាប់តែបានប្រទះឃើញ បុរសរងគ្រោះចងករជាប់ទៅនឹងមាត់ទ្វារ ទើបបង្កឲ្យមានការភ្ញាក់ផ្អើលកើតឡើង និងនាំគ្នាគាស់ទ្វារចូលទម្លាក់ជនរងគ្រោះចុះមកក្រោម និងដឹកតាមរថយន្តរបស់ក្រុមហ៊ុនយកទៅធ្វើការសង្គ្រោះនៅមន្ទីរពេទ្យមិត្តភាពខ្មែរ សូវៀត។

លុះពេលដែលក្រុមកម្មករសំណង់ជាមិត្តភក្តិ ជាច្រើននាក់ រួមទាំងក្រុមសន្តិសុខកោះពេជ្រផងដែរបានបញ្ជូនបុរសរងគ្រោះទៅធ្វើការសង្គ្រោះនៅមន្ទីរពេទ្យមិត្តភាពខ្មែរ សូវៀតនោះ ក៏ត្រូវបានក្រុមគ្រូពេទ្យប្រាប់ថា បុរសរងគ្រោះបានស្លាប់បាត់ទៅហើយ និងដឹកយកទៅតម្កល់ទុកនៅសាល ដើម្បីរង់ចាំក្រុមគ្រួសារមកទទួលយកទៅធ្វើបុណ្យផងដែរ៕