ភ្នំពេញ: មានករណីអគ្គិភ័យមួយបានឆាបឆេះសណ្ឋាគារ aura thematic hostel ដោយមូលហេតុចម្អិនអាហារទុកចោល។

ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង៩និង៥នាទីព្រឹក ថ្ងៃទី២៣ ខែមិថុនា ឆ្នាំ២០១៧ ត្រង់ចំណុច សណ្ឋាគារ aura thematic hostel នៅតាមបណ្ដោយផ្លូវ១៩ ផ្ទះលេខ២០៥ ក្រុម៤០ ភូមិ១០ ស្ថិតក្នុងសង្កាត់ជ័យជម្នះ ខណ្ឌដូនពេញ។

ម្ចាស់ទីតាំងមានឈ្មោះ ចាន់ទី ពិសិដ្ឋ ភេទប្រុស អាយុ២៩ឆ្នាំ មុខរបរលក់ដូរ ស្នាក់នៅសណ្ឋាគារ aura thematic hostel នៅតាមបណ្ដោយផ្លូវ១៩ ផ្ទះលេខ២០៥ ក្រុម៤០ ភូមិ១០ ស្ថិតក្នុងសង្កាត់ជ័យជម្នះ ខណ្ឌដូនពេញ។

ប្រភពព័ត៌មានបានឲ្យដឹងថា នៅមុនពេលកើតហេតុប្រជាពលរដ្ឋបានឃើញផ្សែងខ្មៅខ្មួលបាញ់ចេញពីចំណុចសណ្ឋាគារនេះ ហើយបានរាយការណ៍ជូននគរបាលមូលដ្ឋាន ហើយក៏បាននាំគ្នាយកបំពង់ពន្លត់អគ្គិភ័យបាញ់ពន្លត់ ពេលនោះរថយន្តពន្លត់អគ្គិភ័យ២គ្រឿងក៏បានចេញមកជួយអន្តរាគមន៍បន្ថែមទៀតផងដែរ តែត្រូវបានប្រជាពលរដ្ឋបាញ់បំពង់ពន្លត់រលត់ភ្លាមៗតែម្ដងទៅ។

សូមបញ្ជាក់ផងដែរថា ក្នុងហេតុការណ៍នេះមិនបានបង្កឲ្យមានរបួសដល់មនុស្សឡើយដោយខូចខាតតែសម្ភារ:ផ្ទះបាយតែប៉ុណ្ណោះ៕