កណ្តាលៈ កម្លាំងប៉ុស្តិ៍នគរបាលរដ្ឋបាលដីឥដ្ឋ ធ្វើការល្បាត ក្នុងភូមិសាស្ត្រក៏ប្រទះឃើញជនសង្ស័យជិះម៉ូតូមានគ្នា២នាក់ ក៏ដេញតាមពីក្រោយ តែបង្ក្រាបបានតែម៉ូតូ និងម្សៅក្រាមពណ៌សថ្លា០១កញ្ចប់តូច កាលពីវេលាម៉ោង៩និង៣០នាទីព្រឹកថ្ងៃទី២៣ឧសភា២០១៦ នៅចំណុចតាមបណ្តោយផ្លូវជាតិលេខ១ ចំន្លោះគីឡូម៉ែត្រលេខ២៤-២៥ ក្នុងភូមិដីឥដ្ឋកោះផុស៣ ឃុំដីឥដ្ឋ ស្រុកកៀនស្វាយ ខេត្តកណ្តាល។

ប្រភពឲ្យដឹងថា ប្រតិបត្តិការនេះ ខណៈកម្លាំងប៉ុស្តិ៍នគរបាលរដ្ឋបាលដីឥដ្ឋ ធ្វើការល្បាត ក្នុងភូមិសាស្ត្រក៏ប្រទះឃើញជនសង្ស័យកំពង់ឈររេរា មើលឆ្វេងមើលស្តាំ រួចជិះម៉ូតូចេញពីផ្ទះកាត់ដេរសំលៀកបំពាក់មួយកន្លែង ស្ថិតក្នុងភូមិដីឥដ្ឋកោះផុស៣ ដែលមានម្ចាស់ផ្ទះឈ្មោះកែវ ដារ៉ា(ហៅឃ្លី) ភេទប្រុស អាយុប្រហែល៣២ឆ្នាំ ជនជាតិខ្មែរ ឃើញដូចនោះ កម្លាំងប៉ុស្តិ៍មានការសង្ស័យ ក៏ជិះម៉ូតូដេញតាមពីក្រោយ ក្នុងគោលបំណងហៅឲ្យឈប់ធ្វើការសួរនាំ ពេលដេញបានប្រហែល១០០០ម៉ែត្រ ខណៈកំពុងជិះម៉ូតូ ជនសង្ស័យបានបោះចោលម្សៅក្រាម ពណ៌សមួយកញ្ចប់ ទៅម្ខាងរួចជិះកាន់តែលឿន កម្លាំងបានឈប់ម៉ូតូរើសបានម្សៅក្រាមពណ៌សថ្លា០១កញ្ចប់តូច(សង្ស័យជាសារធាតុញៀន) ដែលជនសង្ស័យបានបោះចោល ភ្លាមនោះ កម្លាំងបានជិះម៉ូតូដេញតាមជនសង្ស័យពីក្រោយទៀតរហូតដល់ ម្តុំមាត់ទន្លេ ភូមិដីឥដ្ឋកោះផុស២ ជនសង្ស័យបានផ្តួលម៉ូតូទុកចោររួចរត់ចូលក្នុងព្រៃត្រែងគេចខ្លួនបាត់។

ប្រភពបន្តថា កម្លាំងយើងកំណត់មុខសញ្ញាបានម្នាក់ ឈ្មោះ វៀង យុាំងញ៉ក ភេទប្រុសអាយុ២១ឆ្នាំ ជនជាតិវៀតណាម មានទីលំនៅក្រុមវៀតណាមភូមិដីឥដ្ឋកោះផុស២ ឃុំដីឥដ្ឋ ស្រុកកៀនស្វាយ ខេត្តកណ្តាល មុខរបរមិនពិតប្រាកដ(គេចខ្លួន)។ ម៉ូតូសម្រាប់ធ្វើសកម្មភាព ម៉ាកស្មាស់០១គ្រឿង ពណ៌ខ្មៅ ពាក់ផ្លាក់លេខ តាកែវ1B.4488។

បច្ចុប្បន្ន ម៉ូតូនិងវត្ថុតាងត្រូវបានយកមករក្សាទុកនៅប៉ុស្តិ៍ ដើម្បីធ្វើការស្រាវជ្រាវបន្ត៕