ភ្នំពេញៈ យុវជនម្នាក់ត្រូវឪពុកបង្កើតទ្រាំលែង បានដាច់ចិត្តប្តឹងប៉ូលិសឲ្យចាប់ឃាត់ខ្លួន ខណៈកូនប្រុសរូបនេះ បានប្រើប្រាស់គ្រឿងញៀនដល់កម្រិត ហើយបានប្រើអំពើហិង្សាទាត់ឪពុក២ជើង បណ្តាលឲ្យបាក់ធ្មេញ។

ការឃាត់ខ្លួននេះបានធ្វើឡើងកាលពីវេលាម៉ោង១រសៀល ថ្ងៃទី២៣ ខែមិថុនា ឆ្នាំ២០១៧ នៅចំណុចផ្ទះលេខ៨៥អា ភូមិតាងួន សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។

កូនអកត្តញ្ញូរូបនេះមានឈ្មោះ ឃុន រិទ្ធា ភេទប្រុស អាយុ២៥ឆ្នាំ មុខរបរមិនពិត ស្នាក់នៅផ្ទះកើតហេតុ។ ចំណែកជនរងគ្រោះជាឪពុកមានឈ្មោះ ឡុង រី ភេទប្រុសអាយុ៦៦ឆ្នាំ មុខរបរធ្វើស្រែ ស្នាក់នៅផ្ទះលេខ៨៥អា ភូមិតាងួន សង្កាត់កាកាប ខណ្ឌពោធិ៍សែនជ័យ។

ប្រភពពីឪពុកបង្កើតបានឲ្យដឹងថា កូនប្រុសរបស់គាត់បានប្រើប្រាស់គ្រឿងញៀនយូរមកហើយៗគាត់បានណែនាំប្រាប់ថាកុំឲ្យជក់ថ្នាំញៀនតទៅទៀត ពេលនោះដោយសារតែកូននោះញៀនថ្នាំជ្រុល លែងដឹងគុណទោស បានស្រែកគំរាមគាត់និងបំផ្លាញទ្រព្យសម្បត្តិក្នុងផ្ទះទៀត។

គាត់បន្តទៀតថាកាលពីថ្ងៃទី២២ខែមិថុនាឆ្នាំ២០១៧វេលាម៉ោង១យប់កូនប្រុសរូបនេះបានយកថូផ្កាដែលគាត់ដាំដើឈើទាលនៅមុខផ្ទះបោះចោលអស់ពេលនោះគាត់ក៍បានឃាត់តែកូនគាត់បានទាត់ធាក់ឪពុកចំនួន២ជើងបណ្តាលឲ្យរងរបួសបាក់ធ្មេញ ហើយក៍គេចខ្លួនបាត់។ លុះមកដល់ម៉ោងកើតហេតុខាងលើកូនអកត្តញ្ញូរូបនេះបានអុកឡុកនិងជេរគំរាមគាត់ទើបគាត់ទ្រាំលែងបានក៏ប្តឹងសមត្ថកិច្ចប៉ុស្តិ៍កាកាបឲ្យជួយអន្តរាគមន៍និងឃាត់ខ្លួនតែម្តង។

នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានទាត់ឪពុកពិតមែនហើយជននេះបានប្រាប់សមត្ថកិច្ចថាខ្លួនធ្លាប់ចូលមណ្ឌលកែប្រែចំនួនជា៣ខែហើយបានចេញមកវិញក៏សេពគ្រឿងញៀនទៀតតែសេពបន្តិចបន្តួចប៉ុណ្ណោះហើយនៅមុនពេលកើតហេតុខ្លួនកំពុងតែអង្គុយផឹកស្រាត្រូវសមត្ថកិច្ចឃាត់ខ្លួនតែម្តង។

បច្ចុប្បន្នជនសង្ស័យកំពុងត្រូវបានសមត្ថកិច្ចឃាត់ខ្លួននៅអធិការដ្ឋាននគរបាលខណ្ឌពោធិ៍សែនជ័យដើម្បីចាត់ការតាមផ្លូវច្បាប់៕

https://youtu.be/y08QzUrRTFk