រតនគិរី: លោកអធិការស្រុកវើនសៃ បានប្រាប់Post Newsមុននេះបន្តិចថា មានករណីប្រទះឃើញសាកសពមនុស្សម្នាក់ ដោយសភាពសពមានលក្ខណ:រលួយអស់ទៅហើយ នៅតែសល់តែគ្រោងឆ្អឹង សាយភាយក្លិនអសោចតែប៉ុណ្ណោះ។

ការភ្ញាក់ផ្អើលនេះបានកើតឡើងកាលពីវេលាម៉ោង២និង៣០នាទីរសៀលថ្ងៃទី២៣ ខែមិថុនា ឆ្នាំ២០១៧ ស្ថិតនៅចំណុចភូមិហ្វាំង ឃុំប៉ុង ស្រុកវើនសៃ ខេត្តរតនគិរី។

សមត្ថកិច្ចបានឲ្យដឹងថា មុនដំបូងឡើយសមត្ថកិច្ចទទួលបានព័ត៌មានពីឈ្មោះសៀន សម្បត្តិ ភេទប្រុស អាយុ១៨ឆ្នាំ ជនជាតិឡាវ បានមករាយការណ៍មកថាបានឃើញមនុស្សម្នាក់ស្លាប់ នៅក្បែរចម្ការរបស់ឈ្មោះ ផាន់ ភុយ ភេទប្រុស រស់នៅក្នុងភូមិកើតហេតុខាងលើ ទើបកម្លាំងសមត្ថកិច្ចប្រញាប់ចាត់កម្លាំងជំនាញសហការជាមួយលោកប្រធានមណ្ឌលសុខភាពវើនសៃ និងមេភូមិ មេឃុំ ចុះធ្វើការត្រួតពិនិត្យសាកសព។

ជាក់ស្តែងក្នុងការត្រួតពិនិត្យនោះ ស្ថានភាពសាកសព រលួយសល់តែឆ្អឹង ហើយបើតាមការសន្និដ្ឋាននោះ សាកសពនេះប្រហែលជាស្លាប់ជាង១៥ថ្ងៃ ទៅហើយ ហើយពេលនេះសមត្ថកិច្ចធ្វើគោលការណ៍ស្នើរទៅព្រះរាជអាជ្ញារដើម្បីចាត់វិធានការចំពោះគ្រោងឆ្អឹងសាកសពខាងលើនេះ ចៀសវាងការសាយភាយក្លិនអសោចរំខានដល់ការរស់នៅរបស់បងប្អូនប្រជាពលរដ្ឋ៕