ភ្នំពេញ: កងកម្លាំងអន្តរាគមន៍ខណ្ឌពោធិ៍សែនជ័យ បានធ្វើការចូលឆែកឆេរទីតាំងមួយកន្លែង ដោយធ្វើការឃាត់ខ្លួនបានជនសង្ស័យម្នាក់ រកឃើញថ្នាំញៀនចំនួន៦កញ្ចប់តូច រួមនឹងដាវស៊ាំម៉ូរ៉ៃ១ដើម។
ប្រតិបត្តិការណ៍នេះបានធ្វើឡើងកាលពីវេលាម៉ោង៨និង២០នាទីយប់ នៅថ្ងៃទី ២៣ ខែមិថុនា ឆ្នាំ២០១៧ ស្ថិតនៅចំណុចបន្ទប់ជួលលេខ៣ ភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
មុននឹងឈានដល់ការឃាត់ខ្លួនបានជនសង្ស័យខាងលើ កម្លាំងសមត្ថកិច្ចអន្តរាគមន៍នៃអធិការដ្ឋាននគរបាលខណ្ឌពោធិ៍សែនជ័យ បានជិះម៉ូតូល្បាត
ក្នុងភូមិសាស្ត្រ ដើម្បីទប់ស្កាត់បទល្មើសកុំឲ្យកើតមានឡើង។ លុះដល់ម៉ោងកើតហេតុ ក៏មានប្រជាពលរដ្ឋរាយការណ៍មកថា នៅចំណុចបន្ទប់ជួលលេខ ១៣«ខ» ខាងកើតក្លឹបមីតណាយ ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ មានករណីជួញដូរគ្រឿងញៀន។ ក្រោយពីទទួលបានព័ត៌មាននេះភ្លាម សមត្ថកិច្ចយើងបានចុះទៅដល់បន្ទប់ជួលខាងលើ រួចធ្វើការឆែកឆេរ រកឃើញក្រាមពណ៌សថ្លា ចំនួន៦កញ្ចប់តូច រួមនឹងដាវកែច្នៃ១ដើម។
បច្ចុប្បន្នជនសង្ស័យរួមនឹងវត្ថុតាងត្រូវបានសមត្ថកិច្ចបញ្ជូនខ្លួនមកសាកសួរនិងឃុំខ្លួនបណ្តោះអាសន្ននៅផ្នែកជំនាញនៃអធិការដ្ឋាននគរបាលខណ្ឌពោធិ៍សែនជ័យដើម្បីបន្តអនុវត្តតាមនិតិវិធីច្បាប់៕
មតិយោបល់