ព្រះសីហនុៈ ជនសង្ស័យជាប្តីប្រពន្ធ ១គូ ត្រូវបានកម្លាំងនគរបាលស្រុកស្ទឹងហាវ ធ្វើការឃាត់ខ្លួនបានជាក់ស្តែងក្នុងប្រតិបត្តិការចុះបង្ក្រាបផ្ទាល់ ដែលដឹកនាំដោយលោកវរសេនីយ៍ទោ រស់ កី អធិការនគរបាលស្រុកស្ទឹងហាវ សហការជាមួយនិងនគរបាលប៉ុស្តិ៍រដ្ឋបាល ឃុំទំនប់រលក ដកហូតបានថ្នាំញៀន ១០កញ្ចប់។

ការបង្ក្រាបនេះបានធ្វើឡើងកាលពីវេលាម៉ោង៩និង៤០នាទីព្រឹក ថ្ងៃទី២៤ ខែមិថុនា ឆ្នាំ២០១៧ ស្ថិតនៅចំណុចក្រុម១៣ ភូមិ៤ ឃុំទំនប់រលក ស្រុកស្ទឹងហាវ ខេត្តព្រះសីហនុ។

សមត្ថកិច្ចបានឲ្យដឹងថា ជនសង្ស័យទាំង២នាក់ខាងលើនេះ ទី១មានឈ្មោះ សាន វិត ភេទប្រុស អាយុ៣៤ឆ្នាំ មុខរបរកម្មករនេសាទ ស្នាក់នៅកន្លែងកើតហេតុ និងទី២ឈ្មោះ មាស ថាវី ភេទស្រី អាយុ៤៨ឆ្នាំ ជាប្រពន្ធ មុខរបរមិនពិតប្រាកដ ស្នាក់នៅកន្លែងកើតហេតុ។

ក្នុងនោះដែរ សមត្ថកិច្ចធ្វើការដកហូតវត្ថុតាងរួមមាន ថ្នាំញៀនមេតំហ្វេតាមីនចំនួន១០កញ្ចប់តូច, ទូរសព្ទដៃ ២គ្រឿង, សម្ភារៈជក់គ្រឿងញៀន និង ស្បោងសម្រាប់វេចខ្ចប់គ្រឿងញៀន ជាច្រើនទៀត។

បច្ចុប្បន្នជនសង្ស័យខាងលើ រួមនិងវត្ថុតាង ត្រូវបានសមត្ថកិច្ច នាំខ្លួនមកកាន់អធិការដ្ឋាននគរបាលស្រុកស្ទឹងហាវ ដើម្បីធ្វើការសាកសួរ និងកសាងសំណុំរឿងបញ្ជូនខ្លួនទៅកាន់តុលាការចាត់ការតាមផ្លូវច្បាប់បន្តទៀត៕