កណ្ដាលៈ បុរសម្នាក់ ត្រូវបានសមត្ថកិច្ចធ្វើការឃាត់ខ្លួន បន្ទាប់ពីបានព្យាយាមវាយបុរសម្នាក់ កាលពីម៉ោង៤ល្ងាច ថ្ងៃទី២៣ ខែឧសភា ឆ្នាំ២០១៦ នៅលើផ្លូវលំ ស្ថិតក្នុងភូមិកំពង់ចម្លង ឃុំព្រែកទន្លាប់ ស្រុកលើកដែក ខេត្តកណ្តាល។

នគរបាលស្រុកលើកដែក បានឲ្យដឹងថា ជនរងគ្រោះមានឈ្មោះ ឈាង ឈា ភេទប្រុស អាយុ៤៨ឆ្នាំ មុខរបរនាយផ្នែកអត្តសញ្ញាណប័ណ្ណ នៃអធិការដ្ឋាននគរបាលស្រុកលើកដែក មានទីលំនៅភូមិឃុំកើតហេតុខាងលើ (ពុំមានរងរបួសទេ)។ ចំណែកជនសង្ស័យឈ្មោះ ភិន សាវ៉ាន ហៅ ពីង ភេទប្រុស អាយុ៤០ឆ្នាំ មុខរបររត់ម៉ូតូឌុប មានទីលំនៅភូមិស្ពានដែក ឃុំព្រែកទន្លាប់ ស្រុកលើកដែក ត្រូវសមត្ថកិច្ចឃាត់ខ្លួនជាមួយវត្ថតាង រួមមាន ដែកកាឡេរថយន្ត១ដើម និងម៉ូតូម៉ាក ស៊ុយហ្សុយគី ស្មាស់រីវ៉ូ ពណ៌ខ្មៅ ស៊េរីឆ្នាំ២០០៩ ពាក់ស្លាកលេខ កណ្តាល ១F-៣២៤៤ ចំនួន១គ្រឿង។

សមត្ថកិច្ចបញ្ជាក់ថា វេលាកើតហេតុខាងលើ គ្រាដែលជនរងគ្រោះកំពុងជិះម៉ូតូនៅលើផ្លូវលំក្នុងភូមិឃុំកើតហេតុ ស្រាប់តែជនល្មើសជិះម៉ូតូមកឈប់ស្ទាក់ផ្លូវពីមុខជនរងគ្រោះ ដោយនៅដៃមានកាន់ដែកកាឡេរថយន្ត ហើយស្ទុះចូលទៅវាយជនរងគ្រោះ តែភ្លាមៗនោះ ក៏ត្រូវជនរងគ្រោះបានគេចផុត រួចស្ទុះចេញពីម៉ូតូ។ ភ្លាមនោះ ក៏ត្រូវបានប្រជាជននៅកន្លែងកើតហេតុ បានឃាត់ ហើយសមត្ថកិច្ចក៏ចេញទៅដល់កន្លែងកើតហេតុភ្លាមដែរ រួចធ្វើការចាប់ឃាត់ខ្លួនជនល្មើសតែម្ដង។

បច្ចុប្បន្នជនល្មើសបង្កហិង្សាខាងលើ ត្រូវបានសមត្ថកិច្ចបញ្ជូនមកផ្នែកជំនាញ នៃអធិការដ្ឋាននគរបាលស្រុកលើកដែក ដើម្បីរៀបចំកសាងសំណុំរឿងបញ្ជូនទៅតុលាការតាមនីតិវិធី៕