ភ្នំពេញៈ មានករណីគ្រោះថ្នាក់ចររាចរណ៍ដ៏រន្ធត់មួយរវាងរថភ្លើង បើកបុកជាមួយនឹងរថយន្តមួយគ្រឿង ម៉ាកឡិចស៊ីស RX300 ពេញទំហឹង បណ្តាលឲ្យភាគីខាងរថយន្តឡិចស៊ីសខ្ទេច មួយកំណាត់ខាងក្រោយតែម្តង។

ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង ៨និង១០នាទីព្រឹក ថ្ងៃទី២៧ ខែមិថុនា ឆ្នាំ២០១៧ ស្ថិតនៅតាមបណ្តាលផ្លូវលេខ៥៩៨ សង្កាត់បឹងកក់២ ខណ្ឌទួលគោក រាជធានីភ្នំពេញ។

ម្ចាស់រថយន្តរងគ្រោះមានឈ្មោះ ឧត្តមសេនីយ៍ អេង ហួង ភេទប្រុស អាយុប្រហែល ៤០ជាង មុខងារ បំរើការនៅក្រសួងការពារជាតិ ស្នាក់នៅផ្ទះលេខ២៤ ផ្លូវលេខ៦P សង្កាត់ដង្កោ ខណ្ឌដង្កោ។ ចំណែកឯរថភ្លើងបង្ក បានបើកបន្តទៅស្ថានីយទៀត។

បើតាមសំដីពីម្ចាស់រថយន្តបានប្រាប់ឲ្យដឹងថា នៅមុនពេលកើតហេតុ រូបគាត់បានបើករថយន្តមួយគ្រឿង ម៉ាកឡិចស៊ីស RX300 ពណ៌ស ពាក់ស្លាកលេខ ភ្នំពេញ 2S-6017 ធ្វើដំណើរតាមបណ្តោយផ្លូវ៥៩៨ ក្នុងទិសដៅពីត្បូងទៅជើង លុះដល់ចំណុចកើតហេតុខាងលើ គាត់បានឃើញគេទំលាក់របាំងចំហៀងខាងឆ្វេង ដោយមួយចំហៀងទៀតមិនបានទំលាក់ទេ ព្រោះគាត់ឃើញផ្លូវស្រឡះ ទើបបើករថយន្តឆ្លងកាត់ផ្លូវរថភ្លើងជិតផុតហើយ ស្រាប់តែត្រូវរថភ្លើងបើកមកបុកចំគូទខាងក្រោយយ៉ាងពេញទំហឹង ហើយធ្វើឲ្យរថយន្តវិលមួយជុំ តែសំណាងល្អមិនបណ្តាលឲ្យអ្នកបើកបរថយន្តរងរបួសអ្វីឡើយ។

ប្រភពពីប្រជាពលរដ្ឋដែលរស់នៅក្បែរកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញរថយន្តឡិចស៊ីស RX300 បើកបរក្នុងទិសដៅពីត្បូងទៅជើងតាមបណ្តាលផ្លូវ៥៩៨ ដោយសារតែរថយន្តខាងលើនេះឃើញផ្លូវស្រឡះ ហើយមិនបានមើលគេទំលាក់របាំងទៀតនោះ ទើបរថយន្តខាងលើបានបើកឆ្លងកាត់ផ្លូវរថភ្លើង ធ្វើឲ្យរថភ្លើងបុកចំគូទពីក្រោយយ៉ាងពេញទំហឹងហើយរថភ្លើងមិនបានឈប់ទេ ក្រោយមករថភ្លើងបានបើកបន្តទៅស្ថានីយទៀត។

ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ និងបានទាក់ទងទៅសមត្ថកិច្ចចររាចរណ៍រាជធានីភ្នំពេញ ដើម្បីមកស្ទូចយករថយន្តខាងលើយកទៅរក្សាទុក និងដោះស្រាយគ្នាតាមផ្លូវច្បាប់៕